Balkoi eta leihoetatik borrokatzen jarraituko dute pentsiodunek
Eskualdeko pentsiodunen elkarteen ekimenez, bost minutuko burrunbada egingo dute astelehenero etxetik.
Koronabirusaren aurkako neurriei jarraituz, Lea-Artibai eta Mutrikuko pentsiodunek kalean egiteko jarduera guztiak bertan behera laga badituzte ere, astelehenetako deialdiari beste era batera eustea erabaki dute. Orain, herriko plazetatik barik, etxeko balkoietatik eta leihoetatik egingo dituzte asteroko eskaerak. Lea-Artibai eta Mutrikuko pentsiodunen mugimenduak jakitera eman dutenez, konfinamenduak iraun bitartean, etxetik borrokatzen jarraitzeko deia egin dute. Hala, 12:00etan hasita, bost minutuko burrunbada egingo dute astelehenero.
Lekeitioko, Markina-Xemeingo, Mutrikuko eta Ondarroako pentsiodunen taldeek egin dute dei bateratua, baina eskualdeko beste herrietakoei ere protestara batzeko deia ere egin die. “Deialdia orokorra da”, azpimarratu dute. Lapikoak edo zarata ateratzen duen edozer gauza atera, eta pentsiodunen aldarrikapenekin jarraitzera gonbidatu dituzte herritarrak. “Bakoitzak nahi duen modura. Musika ipinita, txistuka, lapikoekin zarata ateratzen, txaloka… zarata ateratzea da helburua. Etxetik bada ere, behintzat hor borrokan jarraitzen dugula adierazi nahi diogu jendeari”.
Borrokan jarraitzeko hainbat arrazoi daudela nabarmendu dute, eta gaur egungo pentsio publikoez gain, etorkizunekoak ere jokoan daudela gogorarazi dute. Hala, bestelakoan astelehenero batzeko aukerarik ez duten herritarrei, orain protesta egiteko gonbidapen berezia egin diete. “Guk ez dugu gure pentsioengatik bakarrik borrokatzen, denon pentsioengatik ari gara borrokan; etorkizunekoengatik ere bai. Etxean lanera joan barik daudenei ere bost minutuko protesta horietan parte hartzeko gonbidapena luzatzen diegu “.
Lehen protesta aurreko astelehenean [martxoak 30] egin zuten, eta erantzun “polita” izan zuela esan dute. Aurrera begira ere erantzun bera edo hobea edukitzen jarraitzea espero dute. “Protestekin zenbat lagunek bat egiten dugun zenbatzea ezinezkoa da orain, baina gure auzoetan eta gainerakoetan nabari dezatela hor jarraitzen dugula”.
Egoera lehengora bueltatzen bada, apirilaren 20an ohiko orduan batuko dira herrietako plazetan. Baina egoerak bere horretan jarraitzen badu, aurreikusitako data hori atzeratu egin beharko dutela iragarri dute. Apirilaren 20aren aurreko astean jakitera emango dute deialdi hori mantentzen den edo ez. “Ezin dugu data zehatzik esan; hori ez dago gure esku. Konfinamendu egoera luzatzen baldin bada, asteleheneko burrunbada deialdiagaz jarraituko dugu”.
