Antxoa Eguna bertan behera lagatzea erabaki du Ondarroako Udalak
Kultura zinegotziak jakitera eman duenez, jaia ez dute urteko beste sasoi batean errepikatuko; alarma egoeraren bilakaera ikusita, eta halako jai bat antolatzeko baldintza egokiak ez direla egongo iritzita, aurten ez egitea erabaki dute.
Ondarroako Udalak jakitera eman duenez, maiatzaren 16an ospatu beharreko Antxoa Eguna bertan behera uztea erabaki dute, “COVID-19ak eragindako alarma egoerak ez duelako jai bat antolatzeko behar den gutxiengoa betetzea ahalbidetzen”.
Aritza Aristondo Natxiondo Kultura zinegotziak nabarmendu duenez, erabakia irmoa da. Hau da, jaia ez dute urteko beste egun batean antolatuko. “Uste dugu Antxoa Eguna antxoa sasoian ospatu beharreko jaia dela, hori baita bere oinarria. Arrantzaleak ez daude antxoatan eta herritarrak ere ez daude kalean. Aurtengoa bertan behera lagako dugu, eta seguru datorren urtean gehiago gozatuko dugula 201eko Antxoa Eguna”.
Zinegotziak aipatu duenez, udala hasita zegoen Antxoa Egunaren antolakuntza lanetan, baina erabakia orain arte ez baieztatzearen arrazoia alarma egoeraren bilakaera zelakoa izango zen jakitea izan da. “Alarma egoera, gutxienez, apirilaren 26ra arte luzatuta, ez dugu maiatzaren 16rako halako jai bat antolatzeko baldintza egokiak egongo direla ikusten; alarma egoera apirilaren 26an amaituko balitz ere, ez dugu uste egokia denik 20 egunen buruan halako ekitaldi handi bat antolatzea”.
