Balkoi eta leihoetatik egiten ari dira pentsio duinen aldeko protestak
Pentsiodunen elkarteko kideek esan dutenez, aurreko astean baino jende gehiago nabaritu dute gaurko protestetan.
Herritar bi pentsio duinen aldeko burrunbadan parte hartzen, Ondarroan Koronabirusaren aurkako neurriei jarraituz, pentsio duinen aldeko protestak ezingo dituzte plazetan egin hurrengo asteotan. Beraz, asteroko protestak etxeko balkoietatik eta leihoetatik egitea erabaki dute Lea-Artibai eta Mutrikuko pentsiodunen elkartekoek.
Aurreko astean hasi ziren protestak egiten modu horretara, eta gaur ere, dozenaka herritar batu dira deialdira. 12:00etan hasita, eta zarata ateratzen duen edozer gauza hartuta, bost minutuko burrunbada egin dute pentsio duinen alde.
Ekimenaren antolatzaileek esan dutenez, “nahikoa ondo” joan da gaurko burrunbada. “Herri batzuetan aurreko astean baino zarata gehiago nabaritu da. Eta, beste batzuetan, iluntzeko protesten besteko zarata igarri dugu”.
