100 atxikimendu inguru lortu ditu Apustu etxeen aurkako plataformak
Kanpainak iraun duen tarte txikian herritarren aldetik babes handia jaso dute. Hori guztia eskertzeko bideo bat argitaratu dute.
Apirilaren 13an erronka berri bati hasiera eman zioten Ondarroako Apustu etxeen aurkako plataformako kideek. Herritarrei euren atxikimendua eskatu zienten sare sozialen bidez, eta atxikimendua eman nahi zuten herritarrei argazkia atera eta sare sozialen bidez bidaltzeko deia egin zieten, horien babesa eta jasoteko asmo eta nahiagaz.
“Gure asmoa eguraldi onak hasten zirenean sinadura bilketa bategaz hastea zen. Baina konfinamendu egoera uste baino gehiago luzatu denez, beste erronka bat abantean ipintzea erabaki genuen, daramagun borroka ez itzaltzearren“. Hori bai, aurrerago ez dute baztertzen aurreikusitako sinadura bilketa egitea. “Sinadura bilketak gure asmoen artean jarraitzen du”.
Kanpainak iraun duen tarte txikian (astebete) herritarren aldetik babes handia jaso dutela azpimarratu dute. Eman duten datuen arabera, 100 herritar inguruk bat egin dute deialdiagaz, #ApustuEtxiBetirakoKuarentena, #ApustuEtxiHerritxikKanpoa edo #ApustuEtxiKanpoa moduko traolak erabilita. “Konturatu gara ez gaudela bakarrik, eta horrek sekulako indarra ematen digu. Eskerrik asko parte hartu duzuen guztioi”.
Jasotako babesa handia izan denez, horiei guztiei eskerrak emateko bideo bat egitea erabaki dute. Ez hori bakarrik, eskualdeko eta inguruko Gazte Asanblada gehienen babesa ere jaso dute jakitera eman dute.
Iragarri dutenez, baina, oraindik ere lan asko dute aurretik egiteko. “Horren jakitun gara, eta gogorik ez zaigu falta jarraitzeko. Salbuespen egoera honek gelditu ez gaituen moduan, inork eta ezerk ez gaitu geldituko”. Nabarmendu dutenez, apustu etxeak itxita badaude ere, Internet bidez apustuak egiten edo dirua jokatzen jarraitu daiteke.
