Zabalik dago Etxelilako Erotika tailerrean izena emateko epea
Tailerrean parte hartu nahi dutenek barikua orduko eman beharko dute izena. Ikastaroa zapatuan hasiko da, eta bi orduko bi saio izango ditu.
Ondarroako Emakumeentzako Jabekuntza Eskolaren ekintzen barruan, Erotika tailerra egingo dute datozen egunotan. Tailerra zapatuan [maiatzak 9] hasiko da, eta barikura [maiatzak 8] bitartean izen ematea zabalik dagoela jakitera eman dute Etxelilako arduradunek. Clara Wolfran Perez sexualitatean, autoezagutzan eta berdintasunean aditua den irakasleak eskainiko du tailerra. Tailerrean parte hartu nahi dutenek 664 54 73 67 telefono zenbakira deituta edo mezu bat idatzita edota etxelila@ondarroa.eus posta elektronikora idatzita eman dezakete izena. Matrikularen kostua 5 eurokoa da. “Izena ematerako orduan gurekin harremanetan jartzen direnei kontu korrontearen zenbakia bidaliko diegu ordainketa egiteko”
Alarma egoera dela eta, ikastaro eta tailerren formatua aldatu zuen Etxelilak, eta bide horretatik, teknologia berrietan oinarritutako beste formatu batzuetan ari dira edukiak eskaintzen. Udal iturriek zehaztu dutenez Jitsi plataformaren bidez eskainiko dute tailerra. “Matrikula osatzen dutenei Jitsiko lotura bidaliko diegu”. Gela birtualean elkartzen direnek bi orduko hiru saio egingo dituzte. Lehenengo saioa zapatuan [maiatzak 9] egingo dute, eta hurrengo biak datozen bi zapatuetan; hilaren 16an eta 23an, hain zuzen. Saioei dagokienez, 11:00etatik 13:00etara izango dira.
Saioak irauten duten denbora horretan “energia erotikoak berpizteko ariketak” egingo dituztela jakitera eman du Clara Wolfranek. “Ariketek tresna nagusi bat izango dute: gure gorputza. Gure gogo erotikoa lantzen saiatuko gara, gure baitan berpizteko”. Gorputzaren eta ariketa sentsorialen bitartez hainbat ariketa egingo dituzte. “Internet bidez, baina aldi berean elkarrekin egingo ditugu ariketak. Tartean dantza ere egingo dugu; norberak bere etxean, eta lotsak galduta”.
