Gipuzkoako Hondartzen Mahaian ez dute akordiorik lortu
Aldundiak hondartzak uztailaren 1ean aforoa mugatuta zabaltzeko proposamenak zalantza asko sortu ditu batzarrean batu diren udal agintarien artean, eta ez onartzea erabaki dute.
Gipuzkoako Hondartzen Mahaiaren bilera telematikoa. Argazkia: Gipuzkoako Foru Aldundia Konfinamendua arintzeko hurrengo faseetan hondartzak zabaltzeko baldintzak aztertzeko bilera egin du gaur [maiatzak 14] Gipuzkoako Hondartzen Mahaiak. Gipuzkoako Foru Aldundiko Ingurumen Saileko ordezkariak hondartzak dituzten udalerrietako alkateekin batu dira, eta aldundiak guztiekin estrategia partekatu bat adostu nahi bazuen ere, ez dute akordiorik lortu.
COVID-19aren pandemiak sortu duen egoera ikusita, eta birusaren kutsatzea eta hedapena saihesteko, arreta berezia jarri nahi izan dute hondartzetan. Aldundiaren proposamena ondokoa izan da: uztailaren 1ean aforo mugatuagaz zabaltzea. Aldundiak adostasun bat bilatu nahi bazuen ere, ez du lortu. Aldundiak mahai gainean jarritako proposamenak zalantza asko sortu ditu batzarrean batu diren udal agintarien artean, eta ez onartzea erabaki dute.
Esan dutenez, oraindik ezinezkoa egiten zaie hondartzak uztailaren 1erako zabaltzeko moduan egongo diren edo ez zehaztea. “Guk ez dugu uste maiatzaren 15ean ahal dugunik esan uztailaren 1ean hondartzak zabaldu ahal izango diren edo ez. Lanketa egiten ari gara, baina ez dakigu hurrengoan goitik zer etorriko den ere. Nire ustez, datozen faseak zelan gauzatzen diren ikusi beharko da; horri buruzko erabakiak orain hartzea azkarregi dela iruditzen zaigu”, agertu du Joseba Palenzuela Mutrikuko alkateak.
Argi geratu denez, hondartzak ezingo dituzte zabaldu orain arteko moduko erabilera emateko. Aste batzuk barru hasi daitekeen ezohiko hondartza denboraldirako neurriak hartu beharko direla argi dute bileran parte hartu duten agintari guztiek.
Aldundiak jende pilaketen arazoa saihestu nahi du hondartzetan, eta horretarako aforoa kontrolatu egin beharko dela uste dute. Hori bai, ardura hori udalerri bakoitzarena izango dela gaineratu du Mutrikuko alkateak. “Erabakitzen dena erabakita, guztia udalen bizkar gainean geratzen da. Eskumena udalena da, eta erabakia gurea dela azpimarratu digute. Gauza guztiak ondo neurtu eta aztertu nahi ditugu, eta dugun ahalmena ikusita, orain horrelako erabaki bat hartzea zaila dela iruditzen zaigu”.
