Eusko Legebiltzarrerako hauteskundeak, uztailaren 12an
Iñigo Urkulluk esan du osasun egoerak hobera egin duela eta uztailean egitea "erabaki arduratsuena" dela. "Legez, bi aukera baino ez ditugu: hauteskundeak uztailean egitea edo udazkenera atzeratzea". Uztailean egitea lehenetsi du, "bigarren aukera bat" izateko udazkenean, egoerak okerrera eginez gero.
Iñigo Urkullu Eusko Jaurlaritzako lehendakariak uztailaren 12rako deituko ditu Eusko Legebiltzarrerako hauteskundeak. Lehendakariak deituta, Jaurlaritzak ezohiko gobernu kontseilu bat egin du eguerdian, eta Urkulluk jakinarazi du data.
Osasun arloari, segurtasunari eta legalari buruzko argudioak azaldu ditu Urkulluk hauteskundeen beharra azaltzeko. Azken asteetan kasu positiboek eta heriotzek behera egin dutela nabarmendu du: “Osasun larrialdiaren egoera gainditzea lortu dugu”. Gaineratu du “funtsezko eskubide bat betetzea” ahalbidetuko dutela hauteskundeek: “Legez, bi aukera baino ez ditugu: hauteskundeak uztailean egitea edo udazkenera atzeratzea”. Uztailean egitea lehenetsi du, “bigarren aukera bat” izateko udazkenean, egoerak okerrera eginez gero.
Urkulluk esan du “erabaki arduratsuena” dela eta uztailak “berme guztiak” eskaintzen dituela, baina, izurria berriro hazkunde bidean jarriko balitz, bigarren aukera zabalik uzten duela uztaileko deialdiak. Ildo horretan, ziurtatu du neurriak hartuko dituztela botoa segurtasunez eman ahal izateko, eta erantsi du ez dela beharrezkoa Espainiako Gobernuak alarma egoera kentzea bozetara deitu ahal izateko. Era berean, beharrezko jo du legebiltzarra lehenbailehen martxan jartzea.
Urkullu joan den astean elkartu zen indar politikoetako ordezkariekin, hauteskundeak noiz egin zehazteko. Bozetara deitzeko prozedurak dio Urkulluk gobernu kontseiluari eman behar diola aurrena erabaki horren berri, eta ondoren sinatu behar duela hauteskundeetara deitzeko dekretua.
Oposizioa, ordea, kexu da bozak uztailean egiteko aukerarekin; EH Bildurentzat data hori aukeratu izana ez dago “inongo osasun arrazoietan oinarrituta”
Legealdia urriaren 25ean amaituko da beranduenera, eta hauteskundeak apirilaren 5ean egitekoak ziren. Koronabirusaren izurriak, ordea, hauteskunde deialdia atzeratzera behartu zuen, baina, harrezkero, lan nekeza izan da beste data bat jartzea. Joan den ostegunean, Josu Erkoreka Jaurlaritzako bozeramaileak azaldu zuen datozen hilabeteetarako aurreikuspena dela pandemia urritzea, eta osasun bermeak egon daitezkeela hauteskundeak uztailean egiteko: «Osasun datuen bilakaera positiboa da, eta aukera ematen du jarduera guztien berreskurapena planifikatzeko».
Oposizioa, ez dago ados bozak uztailean egiteagaz. EH Bildurentzat data hori aukeratu izana ez dago “inongo osasun arrazoietan oinarrituta”. Helburu bakarra “bere interes elektoral eta alderdikoiak babestea” dela uste du koalizio abertzaleak. Oposizioak joan den asteko batzarrean beste aukera batzuk proposatu zizkiola adierazi du: “Lehendakaritzako bileran zeuden alderdi politikoak entzun zituen, baina ez zituen aditu, erabakia aldez aurretik hartua zuelako”.
Hauteskundeak berme osoz egiteko konpondu beharko diren osasun gaiez gain, hauteskundeak eta hauteskunde kanpaina berme demokratikoekin garatzeko izango diren zailtasunak azpimarratu ditu EH Bilduk. Ezker subiranistaren ustez, zailtasun handiak egongo dira hauteskunde-kanpainan aukera-berdintasuna bermatzeko, eta zailtasunak izango dira herritarrek beren botoaren zentzua hausnartzeko.
Miren Gorrotxategi Elkarrekin Podemos-en lehendakarigaiaren arabera, berriz, hauteskundeetarako data honekin, EAJk “abstentzio garrantzitsu bat baino ez du nahi, beti eskuinari mesede egiten diona”. Koalizio morearen ustez, hori da da horrelako “erabaki arduragabe” bat hartzeko arrazoi bakarra. “Confebaski bakarrik entzungo ez dion Gobernu alternatibo baten alde borrokatuko gara”, esan du Gorrotxategik.
