Odola ematera deitu dituzte herritarrak, "beharrezkoa eta segurua delako"
Ekainaren 19an Lekeition egongo da odola emateko autobusa, eta ekainaren 29an, berriz, Markina-Xemeinen.
Odola emateko autobusa. Eman odola, nigan bizi da Osakidetzak, Euskadiko Odol Emaileak eta Eusko Jaurlaritzako Osasun Sailak odola ematera bultzatzeko aukeratu duten leloa, eta kanpainari bultzada eman gura diote orain.
Izan ere, osasun sistemako organo emate eta transplanteen jarduerak ohiko erritmoa berreskuratu du berriro, COVID-19aren pandemiak eragindako salbuespen egoera eta gero. Azken hilabeteetan presazko eta lehentasunezko egoeran dauden pazienteentzako arreta bermatu da, baina operazioak martxan daude orain. Hala, pandemia egoeran odola ematea beharrezkoa eta segurua izan bada, eta orain are beharrezkoa dela diote Odolkideak elkartekoek: “Odola ematea beharrezkoa eta segurua izan da, eta orain ere bada. Izan ere, osasun sistema martxan dago”.
Odolkideak elkarteko kideek deialdi berezia egin diete herritarrei, odola ematera joan daitezen, “herritarren borondatea ezinbestekoa delako autonahikodunak izatera heltzeko”. Osasun eta higiene segurtasuna bermatzeko neurriak hartu dituztela gehitu dute.
Ohi legez, odola emateko autobusa Lekeitioko Independentzia plazan egongo da, bai eta Markina-Xemeingo plazan ere.
Egutegia:
- Lekeitio: Ekainak 19 (barikua): 10:00tatik 13:30era eta 17:00etatik 20:30era, Independentzia plazan.
- Markina-Xemein: Ekainak 29 (astelehena): 17:00etatik 20:30era, Plazabarripean.
