Wolframioaren euskal aurkikuntza hizpide, Zientziaren Giltzak Elkartearen hurrengo saioan
Rosa Errazkin Arrazau kimikariak 'Elhuyar anaiak, Wolframa eta espioitza' berbaldia eskainiko du astelehenean Internetez. 18:30ean hasiko den hitzaldia Youtubetik eta Zoom plataforma erabilita ikusi ahal izango da.
COVID-19a dela eta, nahitaezko etenaldia egin ostean, hileroko hitzaldiei berrekingo die Ondarroako Zientziaren Giltzak Elkarteak. Astelehenerako [ekainak 8] zientzia eta historia uztartuko dituen Wolframioaren euskal aurkikuntzari buruzko Elhuyar anaiak, Wolframa eta espioitza berbaldia eskainiko du Rosa Errazkin Arrazau kimikariak. “Askok ez dute jakingo, baina taula periodikoan dauden elementuetatik wolframioa euskal jatorriko bakarra da. 1783. urtean Bergarako Errege Seminarioko Laboratorium Chemicum-en egin zuten aurkikuntza Elhuyar anaiek. Dudarik gabe, gertaera zientifiko hau euskaldunok inoiz zientzia arloan egin dugun ekarpenik handiena eta unibertsalena izan da”.
Berbaldia Beikozinin eskaini ordez Internetetik izango dela esan dute. Zuzenekoa 18:30ean hasiko da, eta interesatuek bi aukera izango dituzte: nahi dutenek Youtube-ko kanaletik sartu ahal izango dira edo bestela, Zoom plataforma erabili dezakete. Zoom aukeratzen dutenek 87946073872 kodea erabili beharko dute sartzeko.
Elkarteko kideek iragarri dutenez, berbaldia Internetetik aproba modura egingo dute. “Gure inguruan dabiltzan talde asko horrela hasi dira, eta guk ere bat egitea erabaki dugu. Sekula horrelakorik ez dugunez egin, proba modura egingo dugu. Pantaila baten aurrean ez dakigu zenbat jende batuko dugun, baina esperientziak ondo irteten badu, errepikatuko egingo dugu. Egia esan, koronabirusak eragindako osasun krisiaren portaera ez dakigu zelakoa izango den, eta ez dakigu ziur noiz egingo ditugun aurrez aurreko hitzaldiak”.
Errazkin 1992tik Bergararako Errege Seminarioko antzinako instrumentu zientifikoen bildumaren arduraduna da, eta egun, Bergarako Laboratorium museoko zuzendaria da. Hitzaldian euskal ilustratuek duela 250 urte sortutako proiektu berritzailea, wolframioaren aurkikuntzaren gorabeherak (espioitza lanak, etab.), wolframioaren ezaugarriak, erabilerak eta Bergarak gordeta duen historia harrigarria kontatuko ditu. Adierazi dutenez, hitzaldia ohikoa baino motzagoa izango da, ordu erdi ingurukoa, eta gaiari buruzko jakin-mina duten herritarrak hitzaldia mugikorretatik, tabletatik edo ordenagailuetatik jarraitzera eta bertan parte hartzera gonbidatu dituzte. “Zoom erabiltzen dutenek galderak egiteko aukera ere izango dute”.
