DBHko ikasleentzako eskola jantoki zerbitzua martxan jartzea eskatu diote Jaurlaritzari
Bigarren hezkuntzako ikasleek ere funtsezko zerbitzu hori izan behar dutela uste dute 'Gure platera gure aukera' plataformakoek, "zerbitzu hori ez izateak ikasleen eskubideak urratzea, langileak kaleratzea eta familia kontziliaziorako oztopoak izatea eragingo lukeelako".
‘Gure platera gure aukera’ plataformak adierazi du, komunikabideen bidez jakin duela Eusko Jaurlaritzako Hezkuntza Sailak irailetik aurrera Haur eta Lehen Hezkuntzako jantokiak normaltasunez irekitzeko asmoa duela, “gizartea urruntzeko neurriak beharrezkoak izango ez diren egoera batean egongo garelakoan”.
Positiboa deritze ikastetxeak eta jantokiak normaltasunez irekitzeko asmoa izatea, baina, Derrigorrezko Bigarren Hezkuntzako ikasleek ere “funtsezko zerbitzu” hori izan behar dutela adierazi dute, derrigorrezko etapa bat delako, eta zerbitzu hori ez izateak “ikasleen eskubideak urratzea, langileak kaleratzea eta familia kontziliaziorako oztopoak edukitzea eragingo lukeelako”.
Hezkuntza eta elikadura oinarrizko eskubideak direla diote, eta administrazio eskudunek bermatu behar dituztela uste dute: “Are gehiago larrialdi egoeran, familiek eta gizarteak, oro har, funtsezko eta beharrezko zerbitzu publikoak behar dituztenean”. Hori horrela, eta urruntze neurriak mantendu behar izanez gero, Hezkuntza Sailak beste plangintza bat eduki behar duela uste dute plataformako kideek. Hala, ordezko espazioak antolatu, txandak handitu eta ikastetxeei jantoki zerbitzua bermatzeko behar dituzten baliabideak eman behar zaizkiela adierazi dute.
Akordioa. ‘Gure platera gure aukera’ plataformakoek, gainera, 2019ko urrian sinatutako legebiltzar akordioagaz aurrera jarraitzeko eskatu diote Jaurlaritzari. Bertan hurrengoa adostu zuten: sukaldeak eraikitzea, kontratazio agiri berrietan adostasun zabalak lortzea, kudeaketa zuzeneko ereduari proposamen berriak egitea eta eskola jantokien funtzionamendua arautzen duen indarreko araudia berriro idaztea.
Elkarregaz lan egiteko prestutasuna agertu dute, “irailetik aurrera ikastetxe eta jantoki guztiak irekita egon daitezen”.
