Ertzaintzak kriminalitate zantzuak ikusten ditu Zaldibarko zabortegian egindako kudeaketan
Zabortegia behera etorri izana Verter Recyclingek egindako kudeaketa akatsekin lotzen du Ertzaintzaren txostenak. Lau hilabete bete dira luizia gertatu zenetik, eta elkarretaratzeak egin dira, besteak beste, Markina-Xemeinen eta Etxebarrian.
Zapatuan Markina-Xemeinen egindako elkarretaratzea. Vocento taldeko egunkariek Ertzaintzak epaitegirako egindako txostenaren berri eman zuten atzo [ekainak 7], eta horren arabera, Ertzaintzak kriminalitate zantzuak atzeman ditu Zaldibarko zabortegiaren kudeaketan. Zabortegia behera etorri izana kudeaketa akatsekin lotzen du txostenak eta azpimarratzen du Zaldibarko zabortegia “zuloa” bezala ezaguna zela garraiolarien artean, zabor mota guztia hartzen zuelako gainbegiratu barik.
Durangoko Instrukzio Epaitegian irekitako sumarioak jaso duenez, kriminalitate zantzuak ikusi ditu Ertzaintzak zabortegiaren gestioan, eta delitu bi egozten dizkio Verter Recycling enpresari: ingurumenaren kontrako delitua alde batetik, herritarren osasuna eta ingurune naturala arrisku bizian jartzeagatik, eta langileen eskubideak urratzea, bestetik.
Ertzaintzak jaso duenez, luizia gertatu baino hiru egun aurretik, Verterrek Lurtek topografia enpresari deitu zion zabortegian agertu ziren pitzadurak aztertzeko. Eta, jakin dutenez, Joaquin Beltranek, luizian harrapatutako langileetako batek, hiru aste lehenago ohartarazi zuen pitzadurak zeudela. Hala ere, Ertzaintzaren arabera, luizia izan baino hamasei egun lehenago, enpresako arduradunek Ingurumen Saileko funtzionarioei esan zieten hondakindegia egonkorra zela. Lurtek enpresak egin zuen egonkortasun azterketa 2018ko abenduan. Verter Recyclingen zabortegiak zegokion lur saila baino gehiago hartzen zuela ere jaso du Ertzaintzak txostenean.
Elkarretaratzeak. Zapatuan [ekainak 6] lau hilabete bete ziren Zaldibarko zabortegia erori eta Alberto Sololuze eta Joaquin Beltran lurperatu zituenetik, eta ehunka pertsona elkartu ziren Markina-Xemeinen, Etxebarrian, Zallan, Zaldibarren, Eibarren eta Elgetan Alberto eta Joaquin omendu eta gertatutakoa “argitzea” eta “erantzukizunak garbitzea” aldarrikatzeko.
Etxebarrian, Olaia aurrean, eta Markina-Xemeinen Goiko Portalean batu ziren herritarrak elkarretaratzean. 10 minutuko isilunea eginda, gertakariari buruzko bertsoa abestuz amaitu zuten elkarretaratzea Markina-Xemeinen.
