Mutrikuko Futbol Taldea 2005-2006 urteetan jaiotako jokalarien bila dabil
Futbol taldearen asmoa berriro ere emakumezkoen kadete taldea ateratzea da. Taldea osatzeko bost bat lagun gehiago beharko dituzte.
Taldeko ordezkariek iragarri dutenez, emakumezkoen kadete taldea osatzeko jendea behar dute. “Oraingoz hamahiru jokalari ditugu, baina taldea ateratzeko orduan motz ibiliko gara. Hori dela eta, 2005 eta 2006 urte artean jaiotako jendea falta zaigu futbol taldea ateratzeko. Gutxienez, beste bost edo sei lagun beharko genituzke denboraldiari aurre egiteko.
Taldeak, hain zuzen, emakumezkoen hiru talde federatu ateratzeko asmoa du 2020-2021 denboraldian. “Iaz, bi talde atera genituen: txikien taldea eta nagusiena. Eta aurtengo gure helburuetako bat kadete taldea ere berriro hor edukitzea da”.
Taldeak Facebook orrialdetik egin du deialdia, eta adin tarte horretako interesatuei eurekin harremanetan jartzeko eskatu diete. “Futbolean jokatu nahi baldin badute, Mutrikun ateak irekita edukiko dituzte. Herriko eta inguruko herrietako guztiak ongietorriak izango dira”. Taldeko kideekin harremanetan jarri nahi dutenek Facebook orrialdera edo mutrikuft@gmail.com helbide elektronikora mezu bat bidali dezakete.
