Sinadura bilketa hasiko du hilaren 14an Ondarroako Apustu etxeen aurkako plataformak
Norbanakoen atxikipenak Alde Zaharrean eta Alamedan jasoko dituzte, ekainaren 14tik 27ra bitartean.
Salbuespen egoera amaitzen eta gizartea “normaltasun berrira” buelta egiten ari dela eta, borrokan jarraitzeko asmoagaz atzera ere kalean daudela jakitera eman dute Ondarroako Joko makinen eta apustu etxeen aurkako plataformako kideek. “Motorra martxan ipini, eta honi denari jarraipen bat emateko sinadura bilketagaz hasiko gara”. Jakitera eman dutenez, ekainaren 14tik 27ra bitartean egingo dute sinadura bilketa, norbanakoen babesa jasotzeko asmoagaz.
Atxikipenak jasotzen herriko bi tokitan egongo dira. Goizetan, 09:00etatik 13:00etara, Alde Zaharrean egongo dira, eta arratsaldetan, 17:00etatik 20:00etara, ostera, Alamedan. “Ez ahaztu hau arazo hau ez dela plataforma osatzen dugun kideona bakarrik, herri osoaren arazoa da; zahar zein gazte”. Herritarrak ekimenean parte hartzera gonbidatu dituzte. Sinadura bilketan txandaren bat egin nahi dutenak ere esku zabalik hartuko dituztela azpimarratu dute. “Animatzen bazarete asko eskertuko genuke. Txandaren bat egin nahi duzuenok jarri gurekin kontaktuan edo idatzi gure sare sozialetako batetara”.
