Zaldupe atzeko aparkalekua izango da Ondarroako aurrekontuko inbertsio nagusietako bat
180.000 euro bideratuko dituzte aurrekontutik aparkalekua berritu eta asfaltatzeko. Aurtengo aurrekontua iazkoa baino zer edo zer txikiagoa izango da.
Ondarroako Zaldupe atzeko aparkalekua Ondarroako Udalaren 2020 aurrekontua 12.354.765,17 eurokoa izango da, iazkoa baino 69.090,83 euro gutxiagokoa. Hirigintzan, esaterako, gauzatuko den proiektu nagusienetako bat Zaldupe atzeko aparkalekua berritzea eta asfaltatzea izango dela nabarmendu dute udal iturriek. Horretarako, 180.000 euro bideratuko dituzte aurrekontutik. 2021eko lehen hilabeteetarako prest edukitzea aurreikusten dute aparkalekua, “horrela herrian dagoen aparkaleku handiena baldintza onetan ipini eta herrian aparkatzeko dagoen arazoa leunduz”.
Eguaztenean [ekainak 17] eman zioten oniritzia aurrekontuari, telematikoki egin zen osoko bilkuran, gehiengo osoagaz. EH Bilduko zazpi zinegotziek aldeko botoa eman zuten, eta EAJko sei zinegotziek, ostera, aurkako botoa eman zuten. Jeltzaleek aurkako botoa emendakinen kontrako erabakiarekin lotu dute. Hala ere, elkarlanerako konpromisoa berretsi dute bi alderdiek.
Udalak proiektu garrantzitsuak dauzka esku artean aurrekontu berriagaz ekiteko, eta gizarte zerbitzuen kalitatea eta udako kultur eskaintza mantentzerako orduan ere ahalegin berezia egingo dutela gaineratu dute. Kulturari dagokionez, Andra Mari jaietako partida da azpimarragarriena. Jaiak bertan behera geratu badira ere, 99.000 euroko partida mantendu egiten dela esan dute. “Jaietako partida garrantzitsua izaten da, eta jairik ez dagoelako murrizketak egin beharrean udaldi osoan herrian martxan jarriko den Kultur Uheri egitasmora bideratuko da partida”.
Beste proiektu garrantzitsu bat hilerri atzeko basoa erosi eta aisialdi gune bat sortzea izango da; 15.000 euro inbertituko dituzte baso erosketan. Bertan, mahai batzuk ipiniko dituzte, natur arnasgune berria sortuz herritik hurbil. “Herrian dauzkagun naturguneak baliatu eta herritarrentzat arnasgune eta aisialdirako guneak sortu behar ditugu”, esan du alkateak. Hirigintzan, gainera, Kamiñazpiko eraberritze prozesuari ere ekingo diote, proiektuaren lehen urratsak ematera 5.000 euro bideratuko dituzte.”Argi dago Kamiñazpi eraldatzeak denbora eta kostu ekonomiko asko suposatzen duela, baina apurka-apurka hasi egin behar gara proiektuarekin, badago beharra eta”.
Lau emendakin. EAJk, hain zuzen, lau emendakin aurkeztu dizkio aurrekontuari, baina atzera bota ziren EH Bilduren bozkekin. “Ezezko bozka ez da emendakinekin ados ez gaudelako, uste dugu orain hobe dela aurrekontuak ez blokeatzea eta aurrera egitea, eta irailean mahaian eseri eta proiektu horiek lantzea”. Emendakinak honako gaiei buruzkoak izan dira: hezkuntza zentroei laguntza zuzenak ematea, irisgarritasuna, mugikortasuna eta Kaleandin igogailu bat ipintzea. “Igogailuaren proiektuagaz hasi baino lehen horren bideragarritasuna aztertuko dugu”, esan du Eneritz Basurko Pagoaga Hirigintza zinegotziak. “Lehenengo azterketa batzuk egin ditugu, baina ez dauka zentzurik orain 20.000 euro aurreikustea, proiektua non egingo den eta zein ezaugarrirekin egingo den zehatz jakin barik”. Aurkeztutako emendakinen harira, bi alderdiek uda ostean mahaian jarri, eta elkarlanerako konpromisoa berretsi dute.
EH Bilduko ordezkariek gaineratu dutenez, batzordeburu bakoitzari beren partidetatik gastatuko ez denaren zenbatespenak egiteko eskatu diete. “Kreditu aldaketen bidez irailean berriro egoera zailtzen bada horri aurre egiteko gaitasuna edukitzeko”.
