Ondarroako Udal erregistro orokorreko bozkalekua lekuz aldatu dute
Udal erregistro orokorreko bi mahaiak Bixikaneko lokalera lekualdatu dituzte.
Ondarroako Udalak jakitera eman dutenez, uztailaren 12an egingo diren Eusko Legebiltzarrerako hauteskundeetarako bozkalekuetan aldaketa bat egongo da. Udal iturriek agertu dutenez, COVID-19aren testuinguruan, neurri bereziak hartu beharko dira bozkalekuetan, “herritarren segurtasuna bermatze aldera”. Hori dela eta, azken hauteskundeetan Udal Erregistro Orokorrean egon ziren mahaiak (lehenago Kalapitxin zeudenak), Bixikaneko lokalera lekualdatuko dituzte.
Azpimarratu dutenez, auzotarrek bozka toki berrian eman beharko baldin badute ere, ohiko mahaiak (1.2.U eta 1.3.U) mantenduko dira. Udal iturrien iritziz, gainera, Bixikaneko lokala segurtasun neurriak mantentzeko egokiagoa da. “Bixikaneko lokalean espazio gehiago dago, eta udalak uste du mahaikide, ahaldun eta herritarren segurtasun neurriak mantentzeko egokiagoa dela”. Apirilaren 5eko hauteskundeetarako aurreikusita zegoen modura, bestalde, Kamiñazpiko bozkalekuak Alkoholiko Anonimoen lokaletik Zubi Zahar herri ikastolara lekualdatuko dituzte.
Guztira hamar mahai ipiniko dituzte Ondarroan: bi udal erakusketa aretoan (1.1.A eta 1.1.B) bi Bixikaneko lokalean (1.2.U eta 1.3.U), lau Institutuan (2.1.U, 2.2.A, 2.2.B eta 3.1.U) eta bi Zubi Zahar herri ikastolan (2.3.A eta 2.3.B).
Bozka ematerako orduan, honako aholkuak jarraitzeko eskatu dute:
- Bozkalekura joan aurretik, ahalegindu eskuak garbitzen.
- Ilaran zain egon bitartean, bi metroko segurtasun tartea mantendu.
- Bozkalekuan sartzeko maskara erabili behar da.
- Errespetatu mahaian daudenak, eta pazientziaz jokatu. Kontuan hartu beraiek egun guztian daudela.
- Hauteslekuak erabili aurretik, bitartean eta ostean garbituko dira.
Gogorarazi dutenez, posta bidezko bozka martxan dago. “Bide hori aukeratzea inoiz baino gehiago gomendatzen da, segurtasuna bermatze aldera”. Lehen itzulia martxan dago uztailaren 2ra arte. Bigarren itzulia, ostera, ekainaren 22tik uztailaren 8ra egingo dute.
