Punta-puntako bertsolariek beteko dute Mutrikuko Galbaixotako bertso jaialdiko oholtza
Bertsozaleek Lujanbio, Arzallus, Peñagarikano eta Iguaran ikusteko aukera izango dute barikuan. Sarrerak aldez aurretik hartuta joan beharko da. Txartelak bost euroren truke lortu ahal izango dira Turismo Bulegoan.
Urteko sasoi honetan ohitura den modura, Galbaixotako bertso jaialdia antolatu du Mutrikuko Bertso Eskolak, Mutrikuko Udalak lagunduta. Jaialdia barikuan [irailak 4] egingo dute, 22:30ean hasita, Zabiel Plazan. Antolatzaileek azpimarratu dutenez, segurtasun neurriak direla eta, aforo mugatua egongo da (84 lagun). Sarrerak aldez aurretik hartuta joan beharko da saiora. Txartelak bost euroren truke lortu ahal izango dira Turismo Bulegoan, eta bertsozale guztiei bertaratzeko gonbidapena luzatu diete.
Ohiko formatu tradizionalean egingo dute jaialdia, eta beste behin ere saio “orekatu” bat eskaintzeko apustua egin dute bertso eskolako kideek. Aurten ere punta-puntako bertsolariak gonbidatu dituzte. Bertaratzen diren bertsozaleek Maialen Lujanbio, Amets Arzallus, Angel Mari Peñagarikano eta Oihana Iguaran bertsolarien ateraldiekin gozatzeko aukera izango dute. “Euskal Herriko Bertsolari Txapelketako bi txapeldun izango ditugu taulagainean, eta horiekin batera azken urteotan hutsik egin ez duten Peñagarikano eta Iguaran”. Gai jartzaile lanetan, berriz, Unai Belaustegi mutrikuarra ariko da.
Antolatzaileek ohartarazi dutenez, COVID-19a dela eta, aldaketa bat edo beste izango ditu aurtengo saioak. Sarreran egon daitezkeen jende pilaketak saihestu nahian, hitzordua baino arinago gerturatzeko gomendatu dute. “Jendea ohi baino lehenago gerturatu beharko da Zabiel Plazara markatuta egongo diren lekuak betetzen joateko. Antolatzaileok ariko gara jendeari non jarri behar den laguntzen”.
Gaineratu dutenez, saioa behin hasita kaletik igarotzen direnek ezingo dute saioa ikusten geratu. “Protokoloak ez du baimentzen horrelakorik. Igarolekua dagoen tokitik igarotzeko baimena izango dute herritarrek, baina ezingo dira ikusten geratu”. Saioaren amaieran ere jendeak plazatik “modu ordenatu” batean irten beharko duela gogorarazi dute. “Lehen egiten zen modura jendea ezingo da bertso saioa komentatzen geratu, ezta bertsolariengana autografoa eskatzera hurreratu”.
Sarreren salmentatik lortzen den dirua, bestalde, bertso saioa ordaintzeko izango dela iragarri dute. “Protokoloa dela eta, urtero eskuz esku pasatzen den poltsarik ezingo da pasa; sarreretatik lortzen den dirua saioaren zati bat ordaintzeko izango da”.
