Neguko arropa bilketa egiten ari da Ondarroako Yaalah elkartea
7 eta 14 urte bitarteko gaztetxoentzako neguko arropa eta oinetakoak jasotzea da elkartearen asmoa. Elkarteak Antiguako Ama kalean duen lokalean egiten ari dira bilketa; irailaren 16a izango da horretarako azken eguna.
Euskal Herriko beste hainbat elkarte modura, Ondarroako Yaalah saharar herriaren aldeko elkarteak ere neguko arropa biltzeko elkartasun ekimenagaz bat egin du. Ondarroako Udalagaz elkarlanean ipini dute martxan kanpaina. COVID-19ak sortu duen egoera dela eta, aurten ez da saharar errefuxiatuan kanpalekuetan bizi diren haurrik etorri Euskal Herrira uda igarotzera eta, ondorioz, ez da ailegatu horien etxeetara bertoko herrietatik itzultzean bete-bebeta eraman ohi dituzten maletarik ere.
Hori dela eta, elkartasun deia egitea erabaki dute Ondarroatik ere. “Haur hauei onura handia egiten die Oporran Bakean programak: mediku azterketak, kultura trukaketa eta elikadura egokia jasotzen dituzte, esate baterako. Baina horrez gain, negua desertuan igarotzeko materiala eramaten dute: neguko arropa, eskola materiala eta janaria, besteak beste”.
Pandemia tarteko, aurten Oporrak Bakean programak eskaintzen dituen aukera horiek guztiak bertan behera geratu direla ohartarazi dute. “Gure nahia bilketa honen bitartez, gutxienez, lehen ume bakoitzak eramango zukeen material hori guztia helduaraztea da”.
Asteon eman diote hasiera kanpainari, eta datorren astera arte horretan jarraituko dutela adierazi dute. Honako egun eta orduetan egingo dute bilketa:
- Irailarek 9tik 11ra, goizez; 11:00etatik 13:00etara
- Irailaren 14tik 16ra, arratsaldetan; 17:00etatik 19:00etara.
7 eta 14 urte bitarteko gaztetxoentzako neguko arropa eta oinetakoak batzea da elkarteko kideen nahia, eta ezaugarriak betetzen dituzten arropak Antiguako Ama kalean dagoen elkartearen egoitzara (Antonio argazki denda zegoen lokalera) eramateko eskatu dute. “Oporrak Bakean parte hartzen duten umeentzako arropa biltzea da gure nahia, baina beste adin bateko haurren edo nagusiagoen arropa ere ekartzen badigute guk hartu egingo dugu. Egoerak lagatzen badu, asmoa azaroaren amaieran kanpalekuetara joatea da, eta orduan eramango genuke materiala”.
