Artisau azoka eta guzti dator Mutrikuko Merkatu Txikia
Herriko zortzi ekoizlek eta Eixu artisau elkarteko hamabost artisau eta sortzailek parte hartuko dute zapatuan 09:00etatik 14:00etara Goiko eta Beheko Plazetan egingo den Merkatu Txikian.
Mutrikuko Udalak jakitera eman duenez, zapatuan [irailak 12] egingo dute iraileko Merkatu Txikia. Udal iturriek esan dutenez, oraingo honetan artisau azoka ere egingo dute egun berean. Herriko ekoizleek eta Elorrioko Eixu artisau eta sortzaile elkarteko kideek Goiko eta Beheko Plazetan ipiniko dituzte postuak. Herriko zortzi ekoizlek eta Eixu elkarteko hamabost artisau eta sortzailek parte hartuko dute ekintzan.
09:00etan zabalduko ditu ateak azokak eta 14:00etara arte erosketak egiteko aukera izango dute bertaratzen diren herritar eta bisitari guztiek. Baserriko produktuak, landareak, eztia, marmelada, artzain gazta, sendabelarrak, saskiak, jostailuak, txotxongiloak, artelanak eta gehiago erosteko aukera egongo da. “Goiko Plazan bederatzi artisauk ipiniko dituzte erakusmahaiak. Goiko Plazako irteeran, Erdiko kalean, beste bi artisauk ipiniko dituzte erakusmahaiak. Beheko Plazaren azpiko aldapan ere beste bi artisauk ipiniko dute erakusmahaia. Beheko Plazan beste lau artisauk ipiniko dituzte erakusmahaiak eta, ohi modura, herriko ekoizle guztiak ere han egongo dira”.
Ohartarazi dutenez, segurtasun neurriak bermatuta egongo dira Merkatu Txikian. “Udalak zein ekoizle eta artisauek neurri bereziak hartuko dituzte erosketak era seguruan egin ahal izateko. Segurtasuna bermatzeko esfortzua denon aldetik egin behar dugu, eta horretarako erosleei zentzuz jokatzea eskatzen dugu udaletik”.
