Txarto sailkatutako hondakin ez organikoak murriztu nahi dituzte Debabarrenan
Mankomunitateak egindako azterketa baten arabera, hondakinak txarto sailkatutako 100 poltsatik gora antzeman dituzte Mutriku, Deba, Elgoibar, Eibar eta Ermuako edukiontzi marroietan. Mutrikun hamabost puntu beltz identifikatu dituzte.
Debabarrena Mankomunitateko ordezkariek jakitera eman dutenez, Mutriku, Deba, Elgoibar, Eibar eta Ermuako edukiontzi marroietan botatako hondakinen jarraipena egin dute. Hamar astez, urtea hasi eta alarma egoera dekretatu zenera arte, herritarren ohiturak aztertu dituzte, eta azpimarratu dutenez, hainbat “puntu beltz” identifikatu dituzte. Ondorioztatu dutenez, edukiontzi batzuetan mota guztietako hondakin ez organikoak antzeman dituzte. “Zoritxarrez, beste edukiontzi batzuetan bota beharreko hondakin ez organikoak zituzten poltsa ugari agertu ziren”.
Azterketaren emaitzak jakin ondoren, biohondakinen edukiontzi marroira txarto sailkatuta botatzen den hondakin kopurua ahalik eta gehien murrizteko aukera desberdinak aztertzen ibili direla eta kopuru hori murrizteko lanean hasita daudela iragarri dute. “Edukiontzi marroietan hondakin ez organikoen 100 poltsa baino gehiago agertu ziren”. Mutrikun hamabost puntu beltz identifikatu dituzte, Deban eta Eibarren hamahiruna, hiru Elgoibarren eta bi Ermuan. “Udalerri batzuetan hondakinen %12a desegokia da. Horiek marroia ez den beste edukiontzi batera bota beharko lirateke”.
Abuztu amaieran ikuskapen bat egin zuen Mankomunitateko Ingurumen Sailak, hondakinak edukiontzi marroira oker botatzen dituzten erabiltzaileen profilak ezagutu eta jarrera “desegoki” horiek geldiarazteko hartu beharreko neurriak baloratzeko. Ikuskapenaren ostean, Mankomunitateak honakoa baieztatu du: edukiontzi marroia kutsatzen ari diren mota guztietako hondakinak dituzten poltsa kopurua handia dela oraindik. Mankomunitateko ordezkarien iritziz, askok egindako lan onari kalte egiten diote gutxi batzuek. “Arrazoi ezberdinengatik ez dituzte hondakinak bereizten, eta, gainera, nahasita uzten dituzte edukiontzi marroian”.
