Beira gehiago birziklatu nahi dute Mutrikuko tabernetan
Herriko tabernen inplikazioa sustatu nahi dute kanpainaren bultzatzaileek. Kanpaina bihar jarriko dute abian, eta datozen asteotan hiruna bisita jasoko dituzte tabernariek. Baliabideak ere emango dizkiete beira birziklatzen ez duten establezimenduei.
Beira gehiago birziklatzeko kanpainaren aurkezpena, Eibarren. Argazkia: Debabarrenako Mankomunitatea. Debabarrenako Mankomunitatearen ekimenez, beira gehiago birziklatzeko kanpaina jarriko dute abian barikutik [irailak 18] aurrera Mutriku, Deba eta Elgoibarko tabernetan. Ecovidriorekin batera garatu duten kanpainari esker, tabernen inplikazioa sustatu nahi dute. Gaur [irailak 17] aurkeztu dute kanpaina, eta Iosu Arraiz Mankomunitateko lehendakariak agerraldian adierazi duenez, “hiri hondakinen kudeaketa egokia herritarren lankidetzaren hasierako konpromiso handiarekin hasten da”.
Bultzatzaileek azpimarratu dutenez, beiraren gaikako bilketa handitzea da kanpainaren helburu nagusia. 2019an 2.302 tona beira batu zituzten eskualdeko 413 edukiontzi berdeetan; hau da, 31,5 kilo eskualdeko biztanle bakoitzeko. Datuak onak badira ere, zer hobetu badagoela diote Mankomunitateko iturriek. “Gipuzkoa mailan biztanle bakoitzeko 37,5 kilo batzen direla kontutan hartu behar da. Horregatik sustatu nahi dugu tabernen inplikazioa”.
Duela bi urte Eibarren eta Ermuan egin zuten modura, Mutrikun, Deban eta Elgoibarren ere tabernetara bisitak egingo dituzte kanpainaren arduradunek. Tabernetara hiruna bisita egingo dituztela azaldu dute. Lehenengo bisitan eskutitz bat banatuko diete tabernariei, “beira gaika bildu eta edukiontzi berdera botatzeko duten derrigortasuna azpimarratuz”. Bigarren eta hirugarren bisitetan, aldiz, sailkapena egoki egiten ari direla bermatuko dute. “Hori horrela ez bada, Mankomunitateak neurriak hartuko ditu”.
Beira birziklatzen ez duten establezimenduei, gainera, baliabideak eskura ipiniko dizkietela aurreratu dute. Ecovidriok eta Mankomunitateak gurpildun ontziak banatuko dizkiete behar duten tabernei. Ahal den neurrian, gainera, tabernak dauden guneetan ontzietako edukia edukiontzira errazago eta erosoago iraultzeko Vacri sistema ezarriko dutela ere jakitera eman dute.
