Bazkidetza kanpaina abiarazi du Mutrikuko Musika Bandak
Bazkidetza orriak Albaro dendan, bandako posta elektronikora idatzita edo bandako kide batekin harremanetan jarrita lortu daitezke.
Mutriku Musika Bandak beste urte batez bazkide egiteko aukera eskaini nahi die herritarrei. Hori bai, 2021 urteko bazkidetza kanpainari begira, kobraketa bestelako eran egingo dutela azpimarratu dute. “Orain arte bazkidetza kuota ordaintzeko modu desberdinak zeuden: transferentzia bitartetz bandako bazkideen kontura, urteko kuota ordaintzeko helbideraketa agindu bat jarrita, ordainketa eskura eginda… Baina ordainketa eurak egiten ibili beharrean, kuota guk kobratzea askoz ere erosoagoa dela konturatu gara”.
Hala, Mutrikuko Musika Bandaren lagun edo bazkide izan nahi dutenek beraien kontu korrontearen zenbakia ematea egokiena izango dela uste dute. “Eskuragarri ipini dugun orria bete, eta gero guk kobratuko diegu urteroko kuota”. Bazkidetza orriak Erdiko kaleko Albaro dendan eskuratu ahal izango dira, baita mmbbazkideak@gmail.com posta elektroniko idatzita edo bandako norbaiti galdetuta ere. Eskaera orriak jasotzeko ere bide berak erabiliko dituztela aurreratu dute.
Banda diruz laguntzen dutenek 15 euroko kuotaren truke, bandaren kontzertu esanguratsuenetako CD sorta bat jasoko dute doan. Modu horretara, bazkideek herriko musikariek egiten dute lana ezagutzeko aukera izango dute hurbiletik.
