Eskola jantokietako langileen lehen greba eguna da gaur
Lekeitoko Eskola Publikoan, Ondarroako Zubi Zahar Herri Ikastolan eta Zaldupe eskolan, eta Mutrikuko Goizeko Izarra Ikastolan eta Institutuan bat egin dute greba deialdiagaz. Eskola txikietan ia ez du eraginik eduki grebak.
Ondarroako Zubi Zahar Herri Ikastola aurrean eskola jantokietako begiraleek egindako protesta. Argazkia: Hitza Hiru eguneko greba deitu zuten ELA, LAB, CCOO eta UGT sindikatuek Arabako, Bizkaiko eta Gipuzkoako eskoletako jantokietan; gaurko, urriaren 27rako eta 29rako egin zuten deia. Hezkuntza sailak atzo batzar baterako deia egin arren, ikastetxe publikoetako, itunpekoetako eta pribatuetako jantokietako langileetako batzuk greba egitea erabaki dute. Lea-Artibai eta Mutrikuri dagokionez, grebak zenbait hezkuntza zentrotan eragin du.
Lekeitoko Eskola Publikoan, Ondarroako Zubi Zahar Herri Ikastolan eta Zaldupe eskolan, eta Mutrikuko Goizeko Izarra Ikastolan eta Institutuan bat egin dute greba deialdiagaz. Lekeitioko Eskola Publikoan ez daukate jantoki zerbitzurik, denek greba egin dutelako. Zubi Zahar Herri Ikastolan eta Zaldupe eskolan grebagaz bat egin dute jantokiko begirale gehienek, eta gutxieneko zerbitzuak eskaini dituzte. Mutrikuko Goizeko Izarra Ikastolan ere gutxieneko zerbitzuak eman dizkiete ikastolako ikasleei, eta jakinarazi dutenez, institutuko ikasleak ere bertaratu dira bertara.
Jantoki zerbitzua normaltasunez eskaini dute, aldiz, Lekeitioko Ikastolan eta Iturriotz Institutuan. Baita Ondarroako Institutan eta Mutrikuko San Migel Ikastetxean ere.
Eskola txikietan ia ez du eraginik eduki grebak. Amorotoko, Aulestiko, Berriatuko, Etxebarriako, Munitibarko eta Ispasterko Eskoletan zerbitzua normaltasunez eman dute, langileek ez duelako deialdiagaz bat egin.
Eskaerak. Gogoratu dutenez, maiatzaz geroztik, sindikatuek Hezkuntza Sailarekin bilera bat egiteko eskatu dute, “eskola-jantokien itzulera segurua aztertu eta negoziatu ahal izateko”. Hala ere, Hezkuntza sailak orain arte hartutako erabaki guztiak “alde bakarrez” hartu eta ezarri dituela salatu dute: “Joan den irailaren 15ean hezkuntza-komunitate osoak lehen greba deialdia egin ondoren, hezkuntzako langileen mahai guztiak deitu ditu sailak, azpikontratetako langileak izan ezik”. Hori horrela, sindikatuek “gaitzetsi” egin dute sailak jantokietako langileekin izan duen jarrera, “enpresa pribatuek kontratatutako langileak izan arren EAEko ikastetxeetan zerbitzuak ematen dituzten langileak direlako”.
Lan baldintzak defendatu nahi dituzte, baita osasuna bermatu ere. Aldarrikapenak oso argiak dira: segurtasunaren bermea, enpleguari eta lan-baldintzei eustea, ratioak jaistea eta lan-kargak ez-handitzea, zerbitzu seguruak eskaintzea eta horiek kalitatezkoak izatea.
Sindikatuen arabera, aurreko ikasturteko ratioak dituzte, eta ez diete jaramonik egin talde egonkorren eta espazioaren beharrei. Ikusi dute “inprobisazioak” eta jantoki seguruak izateko langile faltak “mesfidantza” eragin dutela, eta, sindikatuen iritziz, familia askok ez dute zerbitzua eskatzen, “beharra izan arren”. Hainbat ikaslerentzat jantokiek duten garrantzia azpimarratu zuten: “Ez dugu ahaztu behar egunean jasotzen duten otordu oso bakarra dela jangela zerbitzua erabiltzen duten ikasle askorentzat”.
Jakinarazi dutenez, Hezkuntza sailak greba hasi baino egun bat lehenago deitu du bilera. “Gehiago dirudi herritarrei eta familiei begirako mugimendua, arazoa konpontzekoa baino, azken egunera arte itxaron baitu greba urriaren 7tik deituta dagoenean”, adierazi dute sindikatuek. Hala, langileek deitutako mobilizazioei esker, Hezkuntza saila kolektibo horren aldarrikapenak entzutera eseriko dela diote, “mobilizazio horiek gabe eta sektoreak duen indarra gabe bilera hori ez zelako posiblea izango”.
