Kontakizun hunkigarri bat dakar Peru Abarka Lehiaketako album berriak
Joan den barikuan aurkeztu zuten Markina-Xemeingo Esperantza aretoan Peru Abarka Album Lehiaketako lan berria. 'Bi txantxangorri haritz adarrean' albumaren xehetasunak eman zituzten Yolanda Larreategi eta Malen Amenabar lehiaketako irabazleek.
Malen Amenabar eta Yolanda Larreategi, 2020ko Peru Abarka Album Lehiaketako irabazleak. Albuma bera bezain hunkigarria izan zen joan den barikuan [urriak 24] Markina-Xemeingo Esperantza aretoan egin zen Peru Abarka Album Lehiaketako lan berriaren aurkezpena. Yolanda Larreategi Duralde eta Malen Amenabar Larrañaga aurtengo irabazleek Bi txantxangorri haritz adarrean albumaren xehetasunak eman zituzten lagunarteko giroan. Albumaren aurkezpenean parte hartu zuten bai eta ere Idoia Arrieta Markina-Xemeingo Udaleko zinegotziak, Mari Eli Ituarte lehiaketako koordinatzaileak eta Iñaki Aldekoa Erein argitaletxeko editoreak.
Udal ordezkariak lehiaketako parte hartzaileen eta antolatzaileen lana zoriondu eta eskertu ondoren, Peru Abarkako albuma mimo bereziagaz egiten dutela azaldu zuen Erein argitaletxeko editoreak. “Ohore bat da guretzako, Markina-Xemeingo Udalagaz daukagun adostasunagatik, horrelako lan ederrak argitaratzeko aukera izatea”. Istorioa tristea izan arren, album berria “askatasunari egindako kanta bat” dela esan zuen Aldekoak, eta narrazioa eta ilustrazioa elkar osatu egiten direla nabarmendu zuen, lanaren mesede.
Ituartek jakitera eman zuenez, narrazioaren indarra izan zen epaimahaiak Larreategirena aukeratzeko arrazoia. «Oso txukun idatzita dago, argia da, eta azkenengo haritzerainoko ibilbide hori dena kontatzen bada ere, norberak ere istorioa eraikitzen joan behar du». Gaia oso gogorra den arren, umore puntuak ere badituela ere aurreratu zuen.
Ilustrazioari dagokionez, lan oso onak aurkeztu zirela azaldu zuen, eta Amanabarren lanak aurreikuspen guztiak ase dituela onartu zuen: «Hasieratik geunden lan honegaz liluratuta, baina storyboardean ez zen ikusten ezer, eta ez dakizu egileak narrazioa zelan garatuko duen. Hala ere, horren onak iruditu zitzaizkigun bai azala eta bai amaituta aurkeztu zuen barruko ilustrazioa, fidatu eta aukeratu egin genuela».
Heriotza. Kontakizuneko gai nagusienetako bat den heriotzak beldur handia ematen diola onartu zuen Larreategik, eta tamalez, hurretik bizi izan du azken aldian. «Bost urtetik ona jende asko joan zaigu, oso hurrekoak. Bakoitza joaten da era baten, eta denok joan behar gara, inork ez daki zelan eta noiz». Horretaz pentsatzen jarrita, heriotza desberdinak imajinatu zituela azaldu zuen, eta hortik etorri zitzaion albumerako ideia, menditik zihoan egun batean. «Idazteak on egiten dit, terapia moduko gauza bat da niretzako, eta esan daiteke idatzi eta gero eduki dudan beldurtxo hori hor geratu dela, badoa apur bat, eta beste baten bila noa». Albumeko protagonistek bizi dutela bizi behar zutena argitu zuen, eta elkar laguntzea erabakitzen dutela, azkenengo bidea egiteko.
Ondoan dituenei eta izan dituenei omenalditxoa ere egin die Larreategik narrazioan; txantxangorria, haritza… haiekin pentsatuta aukeratu ditu.
Basoa. Horrelako testu bat irakurri eta ilustratzeko aukera izatea “zorte handia” dela aditzera eman zuen Amenabarrek. «Ate asko utzi dizkigu zabalik ilustratzaileoi gure interpretazioak sortzeko». Testuan gauza asko esan arren beste asko esan barik geratzen direla azaldu zuen, eta hori interpretatzea izan da Amenabarren erronka. «Protagonisten bizitzaren irudi bat egin nahi izan dut, eta baso baten kokatzea erabaki nuen, basoa izango zen bizitza horren gorabeherak erakutsiko zituen eremua».
Parte hartzaileak zoriondu eta albumean eskaintzak jasotzeko aukera ere ekarri zuen ekitaldiak amaieran. Lan berria besapean eta irakurtzeko gogoz irten ziren aretotik aurkezpenera joan ziren guztiak.
