Ugaitz Mugertza mutrikuarra finaletik kanpo geratu da
Sherpa.ai Aizkolari Txapelketa Nagusiaren finalistak zapatuan [urriak 24] erabaki ziren.
Finalera sailkatutako sei aizkolariak. Argazkia: Aizkolari Elkartea. Lehen mailako hamar aizkolarik Zestoako Gurutzeaga frontoian lehiatu zuten Sherpa.ai Aizkolari Txapelketa Nagusiaren sailkapen kanporaketa, zapatuan, eta Ugaitz Mugertza mutrikuarrak ez zuen finalerako txartela lortu.
Hain zuzen, sei aizkolari hauek ariko dira Bilbao Arenako finalean: Mikel Larrañaga (18:46), Iker Vicente (19:31), Eneko Otaño (19:45), Julen Alberdi (19:51), Aitzol Atutxa (20:01) etaq Jon Irazu (21:01). Mugertza 22:18ko denboragaz geratu zen finaletik kanpo.
Mutrikuarrak adierazi duenez, lehenengo bosten artean sailkatzea ezinezkoa ikusten zuen, baina, seigarren txartel horren bila joan zen. Azken aldian egin dituen entrenamenduekin pozik egon da, eta sentsazio horiek zapatuko kanporaketan islatu ez izanagatik pena apur bat daukala aitortu du: “Esperantza baneukan, eta saiatu ere asko egin naiz. Entrenamendu onak eginda nituen, baina egia esan finalera sartzea oso gaitza ikusten nuen. Aukerak bai ikusten nituen; seigarren postu hori neukan buruan. Lehenengo bosten artean muturra sartzea ia ezinezkoa ikusten nuen. Sartu diren lehen bostak seguru nituen, eta Irazuk lortu duen seigarren postu horrek ihes egin zidan azkenean”. Egurragaz “batere zorterik” ez zuela eduki gaineratu du: “Batez ere hasierako bizpahiru egurrak nahiko gogorrak zirela iruditu zitzaidan. Beste aizkolariekin hizketan, eurenak onak omen zirela esan zidaten. Uste dut alde pixka bat egon zela, baina bestela, ez dago aitzakiarik”.
316 pertsonako aforoa zeukaten zapaturako, eta 260 ikusle batu ziren frontoian. Zozketa bidez erabakita, hiru txandatan aritu ziren aizkolariak.
Garai berrietara egokituta, aizkolariek euren apustua egin dute, eta hasitako aro berri honetan lortzen ari direnagaz pozik daudela dio Mugertzak. Antolakuntza aldetik balorazio positiboa egin dute, “oso pozik· daude. “Oso gustura egon ginen, eta oso ondo antolatuta egon zen. Publikoa ere dezente bildu zen. Balorazioa oso positiboa izan da”, nabarmendu du mutrikuar aizkolariak.
Finala. Azaroaren 29ko finalerako sarrerak laster jarriko dituzte salgai www.aizkolaritxapelketanagusia.eus web orrialdean. 400 ikusleko muga egongo da Bilboko Bilbao Arenan.
Lehen mailakoen finalagaz gain, lehen mailarako promozioa lortzeko lehiatuko dira zortzi aizkolari hauek: Aratz Mugertza mutrikuarra, Larrea III, Corchero, Jauregi, Eneko Saralegi, Pellejero, Zelai lV eta Julen Kañamares. Euskal Irrati Telebistak zuzenean eskainiko ditu aipatu bi finalak.
