Alemaniako Perlen film jaialdiko bigarren saria lortu du 'Mi pequeño gran samurai' lanak
Ekai Lersundi ondarrutarraren bizitza jasotzen duen dokumentalak film laburrik onenaren atalean jaso du saria.
Arantza Ibarra zinemagile ondarrutarrak zuzendutako Mi pequeño gran samurai zinta saritua izan da urriaren 16tik 24ra egin den Hannovergo (Alemania) Perlen Queer Film Jaialdiko sail ofizialean. Ekai Lersundi ondarrutarraren bizitza jasotzen duen dokumentalak, hain zuzen, bigarren saria lortu du film laburrik onenaren atalean; Time and again filmak lortu du sari nagusia.
Zinemagile ondarrutarrak agertu duenez, astelehenean [urriak 26] eman zieten epaimahaiaren erabakiaren berri. “Sekulako ilusioa egin digu. Sail ofizialerako hautatua izate hutsa ere saria ederra izan da, baina bigarren saria jasotzeak are ilusio handiagoa egin digu. Ez sinisteko moduko albistea izan da”.
Nazioartean beste hainbat sari eta aipamen berezi eduki ditu zintak, eta oraindik ere bidea egiten jarraitzen duela gogorarazi du Ibarrak. Besteak beste, urriaren 28tik azaroaren 15era bitartean ospatuko den Madrilgo (Espainia) LesGaiCineMad jaialdi ezaguneko sail ofizialerako ere aukeratu dute ondarrutarraren lana. “LGTBI munduko zinemaldirik garrantzitsuenetako bat da. Hor egoteak ere sekulako ilusioa egin digu”.Film labur dokumentalen sailean, besteak beste, Espainia, Maroko, AEB, Txile, Brasil edo Italiako beste hainbat zintarekin batera lehiatuko du.
