Biohondakinen gaikako bilketa hobetzeko kanpaina egin dute Mutrikun
Debabarrena eskualdeko 260 fruta dendetan, pintxoak dituzten tabernetan eta jatetxeetan materia organikoaren gaikako bilketa sustatzeko kanpaina gauzatu dute abuztua eta urria bitartean.
Debabarrena Mankomunitateak kanpaina berri bat egin du eskualdeko fruta dendetan, pintxoak dituzten tabernetan eta jatetxeetan materia organikoaren gaikako bilketa sustatzeko. “Establezimendu hauek beren jarduera motagatik hondakin organiko edo janari hondakin ugari sortzen dituzte. Horiek edukiontzi marroietara bota behar dira, gero konposta egiteko”.
Kanpaina egin aurretik eskualdeko zenbait establezimenduk hainbat arrazoirengatik hondakinak ez zituzten bereizten esan dute. Azpimarratu dutenez, kanpainaren helburua arrazoi horiek entzutea eta identifikatzea izan da, eta establezimenduei erraztasun gehiago ematea gaikako bilketaren datuak hobetzeko.
Bisitatu dituzten taberna eta jatetxeen artean 45ek hondakin organikoak ez dituztela bereizten egiaztatu dute
Abuztuaren erditik urrira bitartean eskualdeko 260 establezimendu baino gehiago bisitatu dituzte. Informazioa banatu, proposamenak entzun eta biohondakinak birziklatzeko bitartekoak eskaini dituzte. Abuztuaren bigarren hamabostalditik irailaren lehenengo hamabostaldira bitartean, esaterako, eskualdeko 69 fruta denda bisitatu zituzten. Horietan 45 litro hamar ontzi marroi eta 25 litroko beste zortzi eta poltsa biodegradagarriak banatu zituzten, sortutako biohondakinak edukiontzi marroira bota ahal izateko.
Urrian, berriz, 169 taberna eta jatetxe bisitatu dituzte. “Bisita horietan egiaztatu da 45 establezimenduk ez dituztela hondakin organikoak bereizten. Establezimenduen erdiak baino gehiago pintxoak dituzten tabernak dira, eta 25 litroko ontziak banatuko zaizkie”.
Jatetxeei dagokienez, irtenbidea ematea konplexuagoa dela azaldu dute. “Denbora gehiago beharko da gauzatzeko. Mankomunitatetik lantzen ari garen proposamena jatetxe bakoitzean edukiontzi marroiak jartzea da, hondakinak ahalik eta erraztasun handienekin bertan uzteko. Kasu askotan, kamioiak iristeko zailak diren lan eremuetan jartzen dira edukiontziak, eta, horregatik, irtenbide bideragarria, teknikoa eta ekonomikoki sostengarria proposatu behar dugu”. Arazoari irtenbidea 2021ean eskaini ahal izatea espero dute.
Irailean birziklapen daturik onenetako bat izan duen herrietako bat Mutriku da
Datu onak. Bestalde, gaikako bilketak irailean gora egin duela nabarmendu dute Mankomunitateko iturriek. “Datuak positiboak dira, eta, pausoz pauso ari gara gaikako bilketa datuak hobetzen eskualdean”. Zehaztu dutenez, hondakinen %54,71a bildu dute gaika eskualdean, iaz baino %1,03 gehiago. Jakinarazi dutenez, eskualdeko birziklapen daturik onenak dituzte herriak Deba eta Mutriku izan dira, %66,76 eta %64,54arekin, hurrenez hurren. “Eskualdeko bataz bestekoa bainoa 10 puntu gehiago jaso dituzte”.
Edukiontzi marroietan 405 tona biohondakin jaso dituzte, 290 tona paper eta kartoiaren edukiontzian, 126 tona ontzi arinen edukiontzian eta 160 tona beiraren edukiontzi berdean. Bestelako 355 tona ere bildu dituzte gaika. Horien artean, nabarmentzekoak dira egurraren gaikako bilketan jasotako 233 tonak. Edukiontzi grisean, aldiz, 1.183 tona errefusa jaso dituzte.
