Minbiziaren Aurkako Elkarteak eskerrak eman dizkie mutrikuarrei
Herritarrei ez eze, dendariei eta Mutrikuko Udalari ere eskerrak eman diete bularreko minbizia ikustaraztearren.
Mutrikuko Minbiziaren Aurkako Elkarteko kideek eskerrak eman dizkiete urriaren 19an Bularreko Minbiziaren aurkako Nazioarteko Egunarekin bat egin zuten herritarrei eta dendariei. Horiekin batera Mutrikuko Udalari ere esker ona adierazi diote. “Eskerrak eman nahi dizkizuegu aurten ere bularreko minbiziaren aurkako borrokan konpromisoa erakusterako orduan izan duzuen jarrera onagatik, erantzun bikainagatik eta lankidetzagatik. Badakigu ez direla garai errazak, baina poz handia eman digu ilusio eta bultzada berarekin jarraitzen duzuela ikusteak”.
Elkarteko kideek gogorarazi dutenez, hamabost segundoz behin mundu mailan emakume bati bularreko tumore baten diagnostikoa egiten zaio. 2019ko datuetan erreparatuz gero, Gipuzkoan, 545 pertsonatan izan zuen eragina. “Zuen ekarpenarekin egun hau herritarrentzako, eta bereziki emakumeentzako, kontzientziazio eta sentsibilizazio egun bihurtzen lagundu duzue. Izan ere, prebentzioari eta diagnostiko goiztiarrari esker, gaixotasun honek eragiten duen kalte larria konpondu daiteke. Horregatik guztiagatik, eskerrak eman nahi dizkizuegu. Ekarpen bikaina da Bularreko Minbiziaren Aurkako Nazioarteko Eguna ikustarazteko eta jardunaldi honen garrantzia eta konpromisoa herritarrei helarazteko”.
