Galdutako objektuekin nola jokatu arautuko dute Ondarroan
Udalak ordenantzaren zirriborroa argitaratu du, eta herritarrek azaroaren 11ra arte ekarpenak egiteko aukera daukate.
Ondarroako Udalak esan du galdutako objektuak gordailutzeko, zaintzeko eta itzultzeko ordenantza prestatzen ari dela. “Ordenantza berri horren helburua da herritarrek Ondarroan aurkitu dituzten galdutako objektuekin zer eta nola egin arautzea”. Horretarako, Galdutako Objektuen Bulegoa sortuko dutela esan dute, eta ordenantza berriari esker, aurkitutako objektuak nola gordailutu, zaindu eta itzuli arautuko dute. “Herritar batek aurkitutako objektuaren jabea agertzen denean eta agertzen ez denean zer egin behar den arautuko da”.
Aurreratu dutenez, udalak idatzita dauka ordenantza berriaren zirriborroa, eta orain herritarrek ekarpenak egiteko epea zabaldu dute; joan den asteko eguenean zabaldu zuten epea [urriak 29], eta azaroaren 11ra arte egin ahalko dira ekarpenak. Proposamenak Udal Erregistro Orokorrean aurkeztu behar dira, presentzialki edo posta elektroniko bidez: orokorra@ondarroa.eus.
