Munitibarko herrigunetik Gerrikaitzera arteko bidean lanak egiten ari dira
Oinezkoek lehentasuna edukiko dute, eta, besteak beste, espaloiak zabalduko dituzte irisgarritasuna hobetzeko.
Argazkia: Plugin Estudioa. Munitibarko herrigunetik Gerrikaitzera bitartean oinezkoentzako ibilbide “egokia eta segurua” egiteko lanak hasi zituzten atzo [azaroak 2].
“Gaur egungo kotxeentzako bide forala moldatuko da oinezkoentzat egokitzeko. Ahalegin berezia egingo da bideak oinezkoentzako funtzionaltasuna irabazteko eta pasatzen diren ibilgailuen abiadura murrizteko”, dio Arkaitz Goikoetxea Etxebarria Munitibarko alkateak. Gainera, azpimarratu du Gerrikaitz auzoko aparkaleku publikoari aldiriko erabilera eman ahal izango zaiola, “behar denean”.
Espaloiak zabaldu egingo dituzte, eta horrek irisgarritasun baldintzak hobetuko ditu, bidea denentzako erabilgarria izateko. Egitekoak burutzeko ahal den neurrian material birziklatua erabiliko duela jakinarazi dute.
Oinezkoek lehentasuna. “Gerrikaitzen bizi diren auzokoek askotan eskatu dute bide forala moldatzea oinezkoari lehentasuna emateko, eta bidea modu seguruan gurutzatzeko. Izan ere, ez da erraza ikustea kotxeek bertatik igarotzean abiadura muga errespetatzen dutela. Horrela, Munitibarko bide-gurutze nagusian aurton egindako obraren estilo berean, herri-gunetik Gerrikaitzera bitartea ere moldatuko da”, azaldu du herriko alkateak.
Udalak 112.960,27 euroko inbertsioa egingo du lanok gauzatzeko, eta bi finantziazio iturri ditu: alde batetik, Eusko Jaurlaritzak 2019an ateratako garapen jasangarriko ekintzak gauzatzeko deialditik 69.513,09 euro jasoko ditu, eta, bestetik, Eusko Jaurlaritzak irisgarritasuna bermatuko duten hobekuntza-obrak laguntzeko deialditik 43.447,18 euro jasoko ditu. Bi diru-laguntzon bidez oso-osorik finantzatuko da herri-gunetik Gerrikaitzera arteko ibilbidea.
Printzipioz, lanok Learri SAMPri esleitu dizkio udalak, “hirigintza lanak egiteko Lea Ibarrako Udalen norbere baliabideari”, eta lanok sei astetan egitea aurreikusi dute, baina denboran apur bat luzatzea “normala izango” litzatekeela zehaztu dute. Beti ere, urte amaierara orduko amaitzea esperi dute.
Ekarpenak egiteko aukera. Lan hauek herritarren egunerokotasunean eragin litzaketen eragozpenengatik aurretiaz barkamenak eskatu ditu alkateak, udalaren izenean.
Udalak Gerrikaitzeko bizilagunei gutun bidez helarazi zien informazioa aurreko astean. Horrekin batera, ekarpenak egiteko aukera ere eman diete. Horretarako edota udalari kontuan hartzeko informazioren bat bidali gura badiete, udaleko buzoian uzteko, udalera deitzeko, alkatetza@munitibar.org helbide elektonikora mezua bidaltzeko edo obraren ardunadunari esateko eskatu dute.
