Debabarreneko taberna eta jatetxeen %86ak birziklatzen du beira
Beiraren gaikako bilketa hobetzeko helburuarekin bisitatu dituzten 119 kasuetatik 102k beira birziklatzen dutela esan dute.
Debabarreneko Mankomunitateak eskualdeko taberna eta jatetxeetan beira gehiago birziklatzeko kanpaina abiarazi zuen irailean, eta orain, kanpainaren lehen ondorioak aurkeztu dituzte. Mutriku, Deba, Elgoibar, Eibar eta Ermuako tabernetara bisitak egin ondoren, establezimenduen %86ak beira birziklatzen duela ondorioztatu dute. Irailaren erditik urriaren erdira burutu den kanpainaren lehen fasean, zehazki, elkarrizketatu ahal izan dituzten 119 kasuetatik 102k beira birziklatzen dutela esan dute.
Beiraren gaikako bilketa hobetzeko helburuarekin bisitatu dituzten ostalariei beira birziklatzen laguntzeko bitartekoak ere eskaini dizkietela azaldu dute. “Bederatzi ontzi banatu dira eta zazpi edukiontzi aldatzeko eskatu dute ostalariek, batez ere ontzi handietan jasotako beira edukiontzietan sartzeko Vacri sistema erabili ahal izateko”.
Mankomunitateak ekimenari jarraipena emango diola jakinarazi dute. Beste bi bisita egingo dituztela iragarri dute, sailkapena egoki egiten ari direla bermatzeko. “Horrela ez bada, Mankomunitateak neurriak hartuko ditu”. Esan dutenez, hamazazpi establezimenduren kasuan “zalantzagarria” izan da lehen bisitan jasotako erantzuna. “Bigarren fase batean beste bisita bat egingo zaie; beira birziklatzen duten taberna eta jatetxeen portzentaia %1o0era ahalik eta gehin hurbiltzeko asmoarekin”.
