Mutrikun grabatutako 'Ilargi guztiak' filmaren lehen irudiak ezagutara eman dituzte
Donostiako Fantasiazko eta Beldurrezko Zinemaren 31. Astearen baitan filmaren 'teaser'-a esklusiban ikusteko aukera egon da.
'Ilargi guztiak' filmaren fotograma bat. Argazkia: Nico de Assas. Mutrikuko Santa Katalina komentuan grabatutako Ilargi guztiak filmaren lehen irudiak gaur [azaroak 6] Donostiako Fantasiazko eta Beldurrezko Zinemaren 31. Astearen baitan esklusiban ikusteko aukera egon da. Igor Legarreta zuzendari bilbotarraren bigarren film luzea laster estreinatuko dute zinema aretoetan. Goizean, komunikabideek filmaren aurrerapenaren proiekzioa ikusteko aukera eduki dute, eta arratsaldean berriz, ikusleei begirako beste emanaldi bat ere emango dute. Zehazki, 19:00etan Victoria Eugenia Antzokian Meander filmaren emanaldira bertaratzen diren ikusleek ere ikusi ahal izango dituzte filmaren teaser-a.
Euskaraz filmatua, Arcadi Motion Pictures, Kowalski Films, Pris & Batty Films eta Ilargia Films ekoizpen etxeen filma da; Frantziako Noodles Production ekoizpen etxearekin batera koproduzitu dute. Filmaren grabaketa otsailaren 17an hasi zuten Mutrikun, eta koronabirusaren ondorioz etenda egon ondoren ekainaren 20ean amaitu zuten; Gaintza, Artikutza, Zizurkil, Orozko, Gallarta, Erandio, Erratzu, Urbasa eta Leurtzako urtegian ere egin dute filmaketa.
Igor Legarreta ‘Ilargi guztiak’ filmaren zuzendaria, filmaren lehen irudien aurkezpena egiten. Argazkia: Ilargi guztiak.
Legarretak Jon Sagala gidoilariarekin batera idatzitako narrazio fantastikoaren protagonista nagusiak Haizea Carneros, Itziar Ituño eta Josean Bengoetxea dira. Lier Quesada, Zorion Egileor eta Elena Urizek osatzen dute aktore taldea. Egileek azpimarratu dutenez, Ilargi guztiak ez da beldurrezko filma bat. “Kontakizun erromantikoa, drama fantastikoa da”. Istoria Nafarroa iparraldeko herri ezezagun batean kokatzen, eta XIX. mendearen amaierako landa eremu batean girotua dago. “Emakume misteriotsu batek III. Karlistaldi amaierako bonbardaketa batean zauritu eta hiltzear dagoen umezurtz bat erreskatatuko du. Emakumeak, umea harekin egotearen truke, jaso daitekeen oparirik handiena emango dio: hilezkortasuna”.
Mutrikuko Santa Katalina komentuak grabatutako irudi bat. Argazkia: Nico de Assas.
