'Non dago diru publikoa?' lelopean protesta deitu du Sortuk Ondarroan
Zapatuan Itsasaurre plazan egingo dute protesta. 13:00etatik aurrera, COVID-19ari aurre egin ahal izateko babesa eta baliabideak eskatuko dituzte.
Sortuk mobilizazioa antolatu du Ondarroan zapaturako [azaroak 14], Non dago diru publikoa? lelopean. Itsasaurren plazan elkartuko dira, 13:00etan. Elkarretaratzean, besteren artean, babesa eta baliabideak eskatuko dituzte COVID-19ari aurre egin ahal izateko.
Euskal Herria osasun larrialdi egoeran dagoela eta, erakundeak hartzen ari diren erabakiekin kezkatuta daudela adierazi dute. Sorturen iritziz, egoeraren errua ez da jendearena. “Arduragabekeria gobernuena da. Ez dituzte etxekolanak egin. Berriz ere gaizki eta berandu dabiltza”. Koronabirusari aurre egin ahal izateko, arakatze eta detekzio gaitasuna handitzeko baliabideak biderkatzeko eskatuko dute.
Ohartarazi dutenez, gainera, zerbitzu publikoetan ere murrizketak egin dituzte, eta ez dituzte “beharrezko” inbertsio publikoak egin. Hori dela eta, zerbitzu publikoetako inbertsio publikoak eta baliabideak biderkatzea eskatuko dute. Diru publikoa sektore kaltetuenetan inbertitzeko ere eskatuko dute, sektore zaurgarrienei laguntza ekonomikoa bermatzeko.
