Hastear da Lekeition 43. Euskal Zine Bilera
Datorren martitzenean [azaroak 17] egingo dute aurtengo jaialdiaren aurkezpena, Euskal Zine Bileraren webgunean.
42. EZBko saridun guztiak. Argazkia: Euskal Zine Bilera Datorren martitzenean [azaroak 17] emango dituzte ezagutzera azaroaren 21etik 29ra ospatuko den 43. Euskal Zine Bileraren nondik norakoak. Ana Goitia eta Aitor Abaroa kazetari lekeitiarrek aurkeztuko dute jaialdia, 11:00etan, Euskal Zine Bileraren webgunean. Momentuko egoerak hala eskatuta, aurtengo zine bilerako eduki guztiak zine bileraren webgunearen bidez jarraitu ahalko dira, eta horrela, Lekeition egiten den euskarazko zinema bilerak publiko zabalagoarengana heltzeko bidea ere izango du.
Aurkezpena bera izango da sareen bidez eskainiko duten 43.Euskal Zine Bileraren lehen ekitaldia. Jakitera eman dutenez, jaialdia aurkeztu ondoren Euskal Zine Bilerako antolatzaileek kazetari eta zine zaleen galderak erantzungo dituzte.
Aurreratu dutenaren arabera, Euskal Zine Bilera hiru ataletan banatuko da aurten: Euskarazko zinema Sortuz, Euskararen zinema Partekatuz eta Euskal Zinemagintzarekin Saretuz.
Atalak. Zehaztu dutenez, Sortu atalean zinemaren esperimentazio eta alfabetizazioarekin lotutako ekimenak nagusituko dira. Atal horretan kokatu dute Euskaltzaleen Topagunearekin elkarlanean antolatzen duten Kameratoia gazteentzako euskarazko ikus-entzunezko rallya. Atal horrek hartuko du, bai eta ere, Benito Ansola Saria, eta, beraz, aurreko urtean saria eraman zuen Oier Fuentesek bere filmaren produkzioa zelakoa izaten ari den azalduko du. Zoom izeneko atalean, aldiz, Hazparneko Zinegin Festibalagaz elkarlanean sortutako egitasmoa aurkeztuko dute.
Partekatu atalean dauka lekua Euskal Zine Bileraren Lehiaketak. Hemeretzi lan aukeratu ditutze lehiaketarako, eta webgunearen bidez emango dute horien guztien berri. Irabazleak aukeratzearen arduradunak Aitor Oñederra, Erika Olaizola eta Mikel Rueda izango direla aurreratu dute. Bestalde, Euskal zinemagintzaren figura eta ekimenak ere omentzen ditu zine bilerak urtero, baina oraindik ez dute ezagutzera eman nahi izan aurtengo Euskal Zinemaren Begirada nora zuzenduko duten. Aste batzuk itxaron beharko dira jakiteko.
Azkenik, Saretu atalak euskal ikus-entzunezkoen sortzaile eta erakundeekin harremanetan egoteko aukera eskainiko du. (H)emen elkartearekin batera, euskal zinemagintzaren egoera eta ezinegonak partekatzeko solasaldia antolatuko dute. Era berean, Pantaila Zuria espazioa ere estreinatuko dute, ikus-entzunezko beste jaialdi eta egitasmoei leiho bat irekiz. Oraingoan, Zinegoak jaialdia izango da gonbidatua. Horrez gain, Euskadiko Filmategiagaz elkarlanean, iraganetik datozen irudi eta soinuak bilduko dituzte Atzo8 atalean.
Pantaila guztietan. Aurtengo helburu nagusia Euskal Zine Bileraren zabalkundea izango dela adierazi dute antolatzaileek. “Jaialdia sare bidezko formatura mugitzean aukera berriak sortu dira, eta horien bidez euskal zinemagintza osatzen duten zale eta profesionaletara heltzeko bideak areagotu”.
Era berean, garai zail hauetan elkarlanetik indartzeko apustua egin nahi du Euskal Zine Bilerak. “Zinegin eta Zinegoak jaialdiak, Hemen elkartea, Zine-Lab zinema laborategia, Euskadiko Filmategia eta beste hainbat eragileren elkarlanari esker. Eragile guztien arteko kolaborazioarekin elkar zaindu eta elikatzeko aukera sortzen da, jaialdiaren eta beste eragileen arteko zubiak sendotuz”.
