Ondarroa gune gorritik laranjara pasatu da
Azken 24 orduetan 19 positibo berri erregistratu dituzte Lea-Artibain eta Mutrikun: Lekeitio (6), Ondarroa (6), Mutriku (5) eta Berriatua (2). Gune gorrian daudenak Lekeitio eta Mutriku dira, 100.000 biztanleko 910,85eko eta 731,16ko tasarekin, hurrenez hurren.
Atzo [azaroak 12] COVID-19arekin kutsatutako 19 kasu berri erregistratu zituzten Lea-Artibain eta Mutrikun: Lekeitio (6), Ondarroa (6), Mutriku (5) eta Berriatua (2). Azken datu horiek eskuetan, Ondarroa gune gorritik laranjara pasatu dela esan dute; 100.000 biztanleko 523,86ko tasa edukitzetik 442,37ko tasa edukitzera pasa da. Beraz, 500etik behera daukanez, gune gorritik atera da. Dena dela, Lekeitiok eta Mutrikun gune gorrian egoten jarraitzen dute; 910,85eko eta 731,16ko tasak dituzte, hurrenez hurren.
Bestalde, Bizkaiko Foru Aldundiak atzo [azaroak 12] berritu zituen adinekoen egoitza sareko datuak. Horren arabera, 52 egoiliar daude positibo emanda lurraldean. Intzidentziarik handiena Munitibarko Oizpe egoitzan dago; egoitzan bertan egindako baheketan 15 egoiliarrek positibo eman zuten. Martitzenean [azaroak 10] emandako datuekin alderatuta, atzo [azaroak 12] 3 egoiliar gehiago zeuden Oizpen koronabirusagaz kutsatuta.
Lurraldeka. Araban, Bizkaian eta Gipuzkoan atzo [azaroak 12] 17.061 proba egin zituzten (14.457 PCR eta 2.604 antigeno). Horietatik 1.420 positibo (%8,3) erregistratu zituzten (1.052 PCR bidez eta 368 antigenoen bidez). Kasu gehienak Bizkaian erregistratu zituzten (653); Gipuzkoan 619 atzeman zituzten, eta Araban 137. Horiei EAEn bizi ez diren herritarren artean atzemandako 11 kasu gehitu behar zaizkie. Kutsatu gehien 40-64 urte bitartekoen artean erregistratzen jarraitzen dute (542).
Ospitaleratutakoei dagokienez, COVID-19aren ondorioz atzo [azaroak 12] 500 pertsona zeuden hiru lurraldeetako ospitaleetan ospitaleratuta. Eta horietatik 134 ZIUn daude. Eguazteneko datuekin alderatuta, atzo ospitaleratutakoak gehitu egin ziren.
