29 Arigune daude Ondarroan
Ariguneek edukiko duten betebeharrari buruzko azalpenak eman dituzte Ondarroan egindako Euskaraldiaren hasiera ekitaldian.
Euskaraldiaren aurkezpena Ondarroan Bigarren Euskaraldiari ongietorria eman diote Ondarroan. Eguen [azaroak 19] arratsaldean Beikozini aretoan egindako ekitaldi xumeagaz eman zioten hasiera hamabost egun iraungo dituen ariketa sozialari. Aurtengo Euskaraldiaren berrikuntzetako bat Ariguneak dira, eta Ondarroako Udal Euskara Batzordeko kideek atzoko ekitaldian emandako datuen arabera, 29 Arigune sortu dira Ondarroan.
Besteren artean, kultur eta kirol elkarteek, dendari elkarteak, banketxeek, kontserba egileek, ikastetxeek, kofradiak edota guraso elkarteek parte hartuko dute euskaraz lasai aritzeko guneak sortzeko eta hizkuntza ohituretan eragiteko egitasmoan. Herrian konpromiso hori hartu duten entitateen argazkiekin osatutako bideo bat proiektatu zuten aretoko pantailan.
Josebe Azpiri eta Leire Egiguren euskara batzordeko kideek aurkeztu zuten ekitaldia, eta aurtengo ariketan Ariguneek edukiko duten garrantzia azpimarratzeaz gain, Ahobizi eta Belarriprest rolen egitekoaren berri ere eman zuten, bertso bidez. Nerea Arriolaren Txor-Txor bakarrizketa umoretsuagaz amaitu zen hasiera ekitaldia. Barre algara bat eta bestearen artean, Euskaraldiari buruz hausnartzeko tartea eduki zuten bertaratu ziren herritarrek.
Nerea Arriola, ‘Txor-Txor’ bakarrizketaren une batean.
