Euskal Zine Bilera lehiaketako filmak ematen hasiko da
Euskal Zine Bileraren webgunearen bidez ikusi ahalko dira lehiaketara aurkeztutako film guztiak. Lau edo bost film emango dituzte egunero.
Zapatuan [azaroak 21] hasi zen martxan 43. Euskal Zine Bilera Imanol Rayoren Hil Kanpaiak filmearen emanaldiagaz. Eneko Sagardoy aktorea zen Ikusgarrin egotekoa, baina bertaratzerik eduki ez zuenez hitz batzuk bidali zituen. Gaur [azaroak 23], berriz, lehiaketaren atalari emango zaio hasiera.
Gaurtik azaroaren 26ra bitartean jaialdira aurkeztutako 19 film laburrak ikusteko aukera egongo da Euskal Zine Bileraren webgunearen bidez, gainera ikusleek, EITB Ikusleen sariaren irabazlea aukeratu ahalko dute botoak emanez. Egun bakoitzeko saioa amaitu ostean, filme gustokoenak bozkatzeaz gain, egileekin solasaldi bat ere egongo dela aurreratu dute antolatzaileek.
19:30ean egongo da lehiaketa ikusteko aukera. Egun bakoitzean 4 edo 5 film emango dituzte web orrialdean. Gaur [azaroak 23] eskainiko dituzten filmak ondorengoak izango dira:
- Peru Galbeteren Ura sartu zen barrura (15’)
- Egoitz Diaz eta Unai Portillaren IXA: Prosopon (18’)
- Ximun Fuchs, Manex Fuchs eta Eñaut Castagneten Nire eguneroko maitea (18’)
- Nora Alberdiren Bigarren Sexua (z), collagea (15’).
Euskal Zine Bilerako Lehiaketa, euskaraz ekoitzitako askotariko lanen erakusleihoa da, teknika, tratamendu, genero, sorkuntza prozesu eta gai desberdinak biltzen dituen neurrian. Iazko formatua mantenduz, aurten ere lehiaketa bateratua izango da, hau da, ez dira bereiziko lan profesionalak eta amateurrak. Zuzendaritza, gidoi eta film onenaren sariak ezberdinduko dira. Sari horiek ondorengo hauek izango dira:
- Film onena 1.900 euro
- Zuzendaritza onena 1.600 euro
- Gidoi onena 1.600 euro
- EITB Ikusleen saria 750 euro
