Urtea amaitu baino lehen asfaltatuko dute Ondarroako Magdalena kalea
Asfaltatze lanek iraungo duten tartean kalea itxita egongo da. San Juan Txurru kaleko ibilgailu batzuk ere kendu egin beharko dira kamioien joan-etorria errazteko.
Ondarroako Magdalena kalea. Argazkia: Ondarroako Udala Datozen egunetan goiko bihurgunetik hasi eta beheraino asfaltatuko dute Magdalena kalea. Lanak hasteko data zehatza oraindik ezartzeko dagoela esan dute udal iturriek. “Kaleak konponketa beharra dauka. 2020a amaitu baino lehen aurreikusten da asfaltatze lanekin hastea. Data zehazten dutenean udalak ohiko komunikabideen bidez jakinaraziko du, auzotarrak jakinaren gainean egon daitezen”.
Asfaltatze lanekin hasi aurretik, baina, euri urak bideratzen dituzten kutxatila eta sareten kota igo beharko dela esan dute. “Euri urak hobeto bideratzen laguntzea da asmoa”. Kalean egin beharreko prestaketak egin eta kotak igotakoan hasiko dira asfaltatzeko lanekin.
Lanak egiteaz Lasuen enpresa arduratuko da, eta salbuespenak salbu, lanek irauten duten bitartean kalea itxita egongo da ibilgailuentzat. Obra eremuan lanean ibiliko diren kamioiak, bestalde, San Juan Txurru kaletik sartu eta aterako dira, hori dela eta, leku batzuetako ibilgailuak kendu egin beharko direla aurreratu dute. “Udaltzaingoak aurretiaz emango du autoak kentzeko agindua”.
