257 langileri prebentziozko baheketa egin diete Markina-Xemeinen
Esan dutenez, jasotako laginak Gurutzetako eta Galdakao-Usansoloko ospitaletara bidaliko dituzte, eta langileei emaitzak SMS bidez emango dizkiete 24-48 orduko epean.
Bizkaiko Foru Aldundiak prebentziozko baheketa egin du gaur [abenduak 10] Markina-Xemeingo Atxondo kiroldegiko kantxan; Lea-Artibai eta Busturialdeko adinekoen eta desgaitasuna duten pertsonen 11 zentro sozisanitariotako profesionalei PCR probak egin dizkiete 10:00etatik 17:00etara.
Markina-Xemein, Ondarroa, Lekeitio eta Munitibarko egoitzetakoak, Markina-Xemein, Lekeitio eta Ondarroako eguneko zentroetakoak, Berriatuko Lantegi Batukoak, Markina-Xemeingo Gorabide eta Mundakako desgaitasun zentrokoko 257 langileri egin dizkiete probak.
Aldundiko iturriek esan dutenez, erantzun azkarreko taldeak PCR probak egiten jarraituko dute kasu positiboak bilatzeko; hori dela eta antolatu dute gaurko prebentziozko baheketa ere. “Eskualdez eskualde ari gara baheketak egiten. Markina-Xemeinen probak egiten ditugun bigarren aldia da (lehenengoa iraila amaieran egin genuen)”. Gaur jasotako laginak Gurutzetako eta Galdakao-Usansoloko ospitaletara bidaliko dituzte, eta langileei emaitzak SMS bidez emango dizkiete 24-48 orduko epean.
