Gabon kontzertu berezia eskainiko du Lekeitioko Musikaiak
Musika eskolako ikasle eta irakasleekin prestatutako bideo txikiak plazaratuko dituzte Musikaiaren plataformetan. Abenduaren 15ean hasiko dira emanaldiekin.
Musikaia Musika Eskolako Koral Txikiko ikasleak. Argazkia: Musikaia Urtero Gabon kontzertua ematen du Lekeitioko Musikaia Musika Eskolak Andra Mariren Zeruratzea Parrokian. Kontzertu oso jendetsua izaten da, musika eskolako ikasle askok eta koruek ere parte hartzen dute, eta entzuleak ere ugari izaten dira. Baina, momentuko osasun egoeran jende hori guztiori batzea ezinezkoa denez, eta edukiera kontrolatzea oso gaitza dela ikusi dutenez, emanaldiak jendeari bideo bidez helaraztea pentsatu dute.
“Parrokian edukiera kontrolatzea oso gaitza zela ikusten genuen, eta emanaldia Ikusgarrin egiteak oso jende gutxik parte hartzea suposatzen du. Talde bat sartuta segituan beteko litzateke aretoa, eta 45 bat minutuko emanaldi bat eskaini ahal izateko talde asko behar dituzu. Talde asko ekartzeak publiko askoz gehiago erakartzea dakar. Beraz, Gabon kontzertua antolatzea oso gaitza zela ikusten genuen”, azaldu du Oihana Etxabe Musikaia Musika Eskolako zuzendariak.
Abenduaren 22an ziren kontzertua emateko, eta egun horretan bertan bideo batzuk kaleratzea zen hasierako asmoa. Baina, lan handia eskatzen duen arren, hainbat ikasle eta irakasle animatu dira parte hartzera. Kamara taldekoak, kamara txiki, musika tailerreko txikiak, metal taldekoak, klarinete ikasleak, saxofoikoak, gitarrakoak, Folk Txiki Taldeak, Jazzkonbo Taldeak, trikitixak, koruak… Guztira hamabi emanaldi izango dira. Hori dela eta, egun bakarrean barik, bideo bakoitzari bere garrantzia emanez, egitarau berezi bat prestatu dute Gabon aurreko egunetarako.
Abenduaren 15ean hasiko dira emanaldiekin eta bideo bat goizean eta beste bat arratsaldean kaleratuko dute, 11:00etan eta 15:00etan, hain zuzen ere. Emanaldiko egunak, ostera, ondorengoak izango dira: abenduak 15, 16, 17, 18, 21 eta 22. Eta bideoak Musikaiaren Youtube, Instagram eta Facebook orrien bidez ikusi ahalko dira. Gainera, Musikaiaren webgunetik ere lotura bat egongo dara sare sozial horietara joateko.
Musikaia Musika Eskolako Musika Tailerreko ikasleak. Argazkia: Musikaia
Etxabek aurreratu duenez egitaraua era askotako doinuek osatuko dute. Gabonetako kantak izango dira batzuk, Silent night, Kanpaiak jaietan eta Din dan don beste batzuen artean, eta Gabonekin zerikusirik ez daukatenak ere eskainiko dituzte: Kanuto Zizilindro, Frozen filmeko kanta, En Tol Sarmiento taldearen beste bat…
Berezienetako bat koruek egingo duten bideoa izango dela gaineratu du zuzendariak. Bihotza Begietan jarri diote izena abestiari. Lau koruk hartuko dute parte: Koral Txikiko lehen eta bigarren mailak, Koral Gaztek eta Kantakai Koralak. Gozategin abesti bat ideia modura hartuta, doinua moldatu eta Gabon kanta bihurtu dute. Partituraren konponketak Etxabek berak egin ditu eta letra, berriz, Musikaia Musika Eskolako ikasle baten guraso batek. “Gabonetako ikutua dauka, baina betiko Gabonetako kanta izan barik, gaur eguneko egoerari lotuta dago, itxaropen puntu bat dauka. Oso letra polita egin digu”.
Dena lotuta daukate, eta azken ikutuak besterik ez zaizkie falta emanaldi berezien prestaketagaz amaitzeko. Emaitzagaz abenduaren 15etik aurrera gozatu ahalko da.
