Larrotegi futbol zelaiko argiteria aldatuko du Lekeitioko Udalak
Hiru fasetan egingo dituzte Lekeitioko futbol zelaiaren berrikuntzak; lehenengoan aldatuko dute argiteria. Lanak Gabonak orduko ematea da udalaren asmoa.
Lekeitioko Larrotegi futbol zelaia. Argazkia: Lekeitioko Udala Lekeitioko Udalak 2020rako aurrekontuetan onartu zituen proiektu nagusien artean futbol zelaiaren lehen fasea zegoen (230.000 euro). Lanak maiatzean ziren hastekoak, baina COVID-19 pandemiak eragindako osasun egoera dela eta, proiektua atzeratzea erabaki zuen udalak. “Pandemiaren eraginez ez genekien aurrekontuetan zeintzuk aldaketa egin beharko genituen, eta momentuz bertan behera utzi genuen proiektua”, azaldu dute.
Hala ere, Larrotegi futbol zelaiak 25 urte bete ditu aurten, 1995eko irailaren 4an inauguratu zen, eta, beraz, berrikuntza lanak egitea beharrezkoa dela ikusten du udalak. Horrela, urtea amaitu orduko proiektuari kolpe diote berriz eta lanekin hastea dute asmoa.
Larrotegi berritzeko lanak bi fasetan egitea zeukaten aurreikusita, baina, orain, hiru epetan egitea erabaki dute. “Lehenengo futbol zelaiko argiteria aldatuko dugu, ondoren egin beharreko obratan eraginik ez daukalako”, argitu dute. Aldaketa hori egiteko lizitazioa urtea amaitu orduko ematea da udalaren asmoa eta Gabonen ondoren argien aldaketagaz hastea. 83.000 euroko inbertsioa izango da hori.
Ondorengo faseetan berdegunea zabaltzeko lanak egingo dituzte, inguruko eremuaren itxidura birmoldatu, berdegunea aldatu eta beste lan batzuk ere eramango dituzte aurrera.
