Mutriku berriro ere gune laranjara pasatu da, kasu berriak erregistratu dituztelako
Azken 24 orduetan 7 kasu berri erregistratu dituzte Lea-Artibai eta Mutrikun; Mutrikun 6 kasu berri erregistratu dituzte, eta 1 Ondarroan. Lea-Artibai osatzen duten herrietako intzidentzia mailak beheranzko joerari eusten dion bitartean, Mutrikuko tasa igo egin da.
Atzo [abenduak 10] egindako azterketetan 7 positibo berri erregistratu zituzten Lea-Artibain: 6 Mutrikun eta 1 Ondarroan. Datu horiekin, Mutriku gune horitik laranjara pasatu da; herenegun [abenduak 9] 318,71ko tasa zuen Mutrikuk, eta atzo kasu berriak erregistratu eta gero 393,70eko tasa edukitzera pasatu da. Asteburuan txosten epidemiologikorik argitaratzen ez dutenez, Mutrikuk gune laranjan egoten jarraituko du, gutxienez astelehenera arte [abenduak 14].
Gainerako herrietan kasu berririk erregistratu ez dutenez, intzidentzia tasak behera egiten jarraitzen du. Dena dela, Jaurlaritzaren gaurko txosten epidemiologikoan zenbait herritako tasak ez dituzte eguneratu. Gaur gaurkoz, ondokoa da herriz herriko intzidentzia maila:
- Amoroto: 0
- Aulesti: 0
- Berriatua: 479,62 (ez dute datua eguneratu)
- Etxebarria: 0
- Gizaburuaga: 0
- Ispaster: 134,95 (ez dute datua eguneratu)
- Lekeitio: 82,80
- Markina-Xemein: 100,73 (ez dute datua eguneratu)
- Mendexa: 206,19 (ez dute datua eguneratu)
- Munitibar: 0
- Mutriku: 393,70
- Ondarroa: 372,53
- Ziortza-Bolibar: 0
Hiru lurraldeen arteko mugikortasuna. Bestalde, eguaztenean Iñigo Urkulluk Gabonetarako iragarritako neurrien inguruko zehaztapen gehiago ari dira egiten. Alde batetik, 5.000 biztanle baino gutxiagoko herrietan ostalaritza establezimenduen irekiera ez dela intzidentzia tasaren arabera egingo zehaztu dute. Bestetik, abenduaren 23tik aurrera, hiru lurralde historikoen arteko mugikortasuna baimenduko dela azaldu dute. “Neurriak pandemiaren bilakaeraren isla dira. Hau da, datuak zenbat eta hobeak izan, neurriak orduan eta malguagoak izango dira”.
Dena dela, Gabonetarako ezarritako neurriak urtarrilaren 11n berraztertuko dituztela eta neurriak malgutzea posible dela iragarri zuen Urkulluk.
