Artibai FTren otzara, San Roke Egotetxekoentzat
Txartel saridunik ez dagoela eta, Gabonetako otzara Markina-Xemeingo egotetxera eramatea erabaki du herriko futbol taldeko zuzendaritzak.
Markina-Xemeingo Artibai Futbol Taldeak urtero Gabonetan zozkatzen duen otzara San Roke Egotetxera joan da aurten. Zozketaren zenbakia Gabonetako loteriaren lehen zenbakiaren berdina izaten da. Aurten, baina, lehen saria lortu duen zenbakia 72897 izan da, eta zenbakia oso altua izan denez, ez zeukaten zozketako txarteletan.
Artibai FT-ko zuzendaritzak azaldu duenez, hori dela eta, bigarren sariaren zenbakiko txartela izan da aurtengo sariduna, 06095 zenbakia duena, alegia. Hala ere, zenbaki hori zeukan txartela saldu barik geratu da, eta beraz, Artibai FT-ko zuzendaritzak otzara San Roke Egotetxera eramatea erabaki du, “gure nagusiek goza dezaten”.
Artibai FTko zuzendariak eta San Roke Egotetxekoak otzaragaz, egotetxea aurrean. Argazkia: Artibai FT
