Kontzertu bat antolatzeko xehetasunei buruzko tailer bat eskainiko dute Ondarroan
8 urtetik aurrerako gaztetxoei dago zuzenduta Beikozinik antolatu duen tailerra. Barikuan amaitzen da izena emateko epea.
Europako kontzertu aretoen Open Club Day egunaren harira, kontzertu bat antolatzeko xehetasunei buruzko tailerra eskainiko dute Beikozinin, zapatu [otsailak 6] arratsaldean. Open Club Day ekimenean parte hartzen duten Europako kontzertu aretoek ate irekiak jardunaldi bereziak antolatuko dituzte egun horretarako; askotariko ekintzak antolatu dituzte aretoak barrutik ezagutzera emateko. Beikozinira gerturatzen diren gonbidatuek, esaterako, agertokiaren atzean gertatzen den guztia deskubritzeko aukera edukiko dute.
17:00etatik 20:00etara eskainiko dute doako tailerra, eta, zehaztu dutenez, 8 urtetik aurrerako gaztetxoei dago zuzenduta. Bertan parte hartu nahi dutenek beikozini@gmail.com posta elektronikora idatzi beharko dute; barikuan [otsailak 5] amaitzen da izena emateko epea. “Osasun neurriak direla eta, parte hartzaileek banan-banan egingo dituzte probak. Txandak antolatzeko nahitaezkoa da izena ematea. Parte hartzaile bakoitzari posta elektronikoz jakinaraziko diogu zer ordutan etorri behar duen”. Beikoziniko arduradunek iragarri dutenez, izena ematen duten pertsona kopuruaren arabera antolatuko dute txanden iraupena.
Ikastaroari dagokionez, zuzeneko ikuskizun bati buruzko bitxikeria eta jakin beharreko guztiak erakutsiko dizkiete gaztetxoei. Halako ikuskizun bat egiten duen profesional baten azalean jartzeko aukera edukiko dute, hain zuzen. Zuzeneko bat antolatzeko behar diren ekipo teknikoak ere probatuko dituzte; soinu mahai bat edo agertokiko argiak zelan erabili irakatsiko diete, esaterako. “Kontzertu bat osotasunean zelan antolatzen den erakutsiko diegu, azken finean. Musika taldeek bidaltzen duten rider teknikoetako bat hartu, eta taldeak eskatzen dituen behar horiek guztiak zelan prestatzen diren simulatuko dugu”.
