Aitor Zelaia eta Galder Barbado aske uzteko eskatzeko elkarretaratzeak deitu dituzte
'Ankerkeriari Stop! Aitor eta Galder aske' lelopean egingo dira mobilizazioak. Espainiako Auzitegi Nazionalak launa urteko espetxe zigorra ezarri die Zelaiari eta Barbadori.
#AnkerkeriariStop plataformak deituta, Aitor Zelaia eta Galder Barbado gazte arabarren askatasuna eskatzeko elkarretaratzeak egingo dituzte zapatu [otsailak 6] eguerdian Mutrikun, Ondarroan, Lekeition eta Aulestin. Markina-Xemeinen berriz, domekan [otsailak 7] jarri dute ordua. Mobilizazioak Ankerkeriari Stop! Aitor eta Galder aske lelopean egingo dira. Hemen herriz herriko hitzorduak:
- Aulesti. Zapatua, 12:30ean, herriko plazan.
- Mutriku. Zapatua, 12:00etan, Goiko Plazan.
- Ondarroa. Zapatua, 12:00etan, Alamedan.
- Lekeitio. Zapatua, 13:00etan, Eskolapean.
- Markina-Xemein. Domeka, 13:00etan, Arkupean.
Espainiako Auzitegi Nazionalak launa urteko espetxe zigorra ezarri die Zelaiari eta Barbadori, lehergaiak egiteko materiala edukitzea leporatuta. Ernaik esan dutenez “epaiketa injustua” izan da; salbuespeneko legedia baten adierazle dela adierazi dute. “Argi daukagu Espainian ez dagoela demokraziarik, eta are gutxiago justizia oinarrian daukan estatua. Hori dela eta, gazteok ez dugu onartzen injustizian oinarritutako epaiketa hau, gazteria zirgortzea eta beldurtzea baitu helburu. Eta ozen diogu, ez dugula absoluzioa ez den beste epairik onartuko”.
