Bi ekintza antolatu dituzte Mutrikun, Torturaren Aurkako Egunaren harira
'Herriko lau lagunen errelatoa' dokumentala estreinatuko dute Trabainarrua taldearen ekimenez. Mikel Egibarrek gaiarekin lotuta egindako marrazkien erakusketa ere antolatu dute.
Zapatuan [otsailak 13] Torturaren Aurkako Eguna da, eta egun horren harira, herriko memoria eta herritarren testigantzak lantzen ari den Mutrikuko Trabainarrua taldeak bi ekintza antolatu ditu. Alde batetik, Herriko lau lagunen errelatoa deritzon dokumentala estreinatuko dute, eta, bestetik, Mikel Egibarrek tortura eta espetxea gaiarekin lotuta egindako marrazkien erakusketa ere egingo dute.
Ordu erdiko iraupena duen dokumentalari dagokionez, 60, 70 eta 80. hamarkadetan “atxiloketak, inkomunikazioa, tratu txarrak edo torturak” jasan zituzten herriko lau lagunen testigantzak jaso dituztela esan dute egileek. Bi emanaldi eskainiko dituzte Zabiel kultur etxeko proiekzio aretoan. Lehenengo proiekzioa barikuan [otsailak 12] 20:00etan eskainiko dute, eta bigarrena domekan [otsailak 14], 17:30ean hasita.
Proiekzioak doan badira ere, aforoa dela-eta aldez aurretik izena eman behar da; trabainarrua8@gmail.com helbide elektronikora mezu bat idatzi beharko da. Antolatzaileek iragarri dutenez, otsailaren 20an dokumentala gaztetxean ikusteko aukera ere egongo da; 20:00eta izango da proiekzioa.
Mikel Egibarren marrazki erakusketari dagokionez, bestalde, otsailaren 12tik 14ra bitartean egongo da ikusgai, Zabiel kultur etxeko erakusketa aretoan; 18:00etatik 20:00etara egongo da zabalik aretoa.
