Bi topaketa birtual egingo ditu Debegesak, Emakume Zientzialarien Egunaren baitan
Eskualdeko ikastetxeei eta herritarrei zuzendutako topaketa birtual bana antolatu dute. Izen ematea zabalik dago BPTD Makers-en webgunean.
Eguenean [otsailak 11] Emakume eta Neska Zientzialarien Nazioarteko Eguna da, eta horren harira, hainbat ekimen antolatu ditu Debegesa Garapen Agentziak. Ekintzak, hain zuzen, eskualdeko gazteen artean bokazio zientifiko-teknologikoak sustatzeko, eta bereziki nesken parte hartzea bultzatzeko helburua duen Debabarrena STEAM egitasmoaren barruan kokatu dituzte.
Eguenean, 10:30ean hasita, esaterako, eskualdeko ikastetxeei zuzendutako Zientziaz gozatu, dibertitu eta ikasi topaketa birtuala egingo dute. “Topaketa honetan Maitane Alonso ikertzaile eta asmatzaile gazteak eta Valpat Youtubeko kanal ospetsuko bi protagonistek hartuko dute parte”. Zehaztu dutenez, LH 5-6ko eta DBH 1-2ko ikasleentzat zuzendutako dago topaketa. Izen ematea BPTD Makers-en webgunean egin behar da, albisteak atalean.
Egun berean, 16:00etan hasita, eskualdeko herritarrei zuzendutako beste topaketa birtual bat egingo dute. STEAM Emakumeak: zientziarekiko eta teknologiarekiko pasioa lelopean, eskualdeko emakume zientzialari eta teknologoen mahai-ingurua osatuko dute. Izen ematea zabalik dago BPTD Makers-en webgunean egin behar da, albisteak atalean.
Lorea Arakistain PuntuEUS erakundeko komunikazio arduradunak dinamizatutako mahai inguruan honakoek parte hartuko dute: Amaya Igartua kimikaria (materialen ekimenen koordinatzaile Teknikerren), Ane Rubio biokimiko eta biologo molekurra, Maialen Arrieta astrofisikan doktorea (Sorbonne Unibertistatean gaixotasun neurodegeneratiboen bioinformatikaria) eta Natividad Garcia ingeniari elektronikoa (Nabab Consulting-en sortzaile eta zuzendari exekutiboa).
Emakume eta Neska Zientzialarien Nazioarteko Egunaren harira antolatu diren ekimenak batzeko helburuarekin, gainera, BPTD Makers-en webgunean agenda bat ireki dute. Eskualdean antolatu dituzten ekintzei buruzko informazio guztiak bertan egongo dira eskuragarri.
