COVID-19aren aurkako txertoaren bigarren dosia jarri diete Ondarroako egoitzakoei ere
Egoiliarrak eta goizeko txandako langileak txertatu dituzte Pfizer konpainiak ekoitzitako txertoagaz; denetara 62 lagun txertatu dituzte. Falta diren langileak Galdakao-Usansoloko ospitalean txertatuko dituzte.
Ondarroako Artibai egoitzako egoiliar bat COVID-19aren aurkako txertoaren bigarren dosia hartzen. Argazkia: Ondarroako Udala. Udal iturriek zehaztu dutenez, Artibai egoitzako 62 pertsona txertatu dituzte Pfizer konpainiak ekoitzitako txertoagaz; egoiliarrak eta goizeko txandako langileak txertatu dituzte. Txertoa hartzeko falta diren langileak, lehen dosiagaz egin modura, Galdakao Usansoloko ospitalean txertatuko dituzte. “Bigarren dosia jartzera joateko txandak telefonoz emango dizkiete. Lanaren eta duten laneko txandaren arabera ipiniko diete hitzordua”.
Lea-Artibai eta Mutrikuko eremuan txertoaren bigarren dosia jaso duen azken zentroa izan da Ondarroakoa. Urtarrilaren 19an jaso zuten txertoaren lehen dosia, eta gaur [otsailak 9] bigarren dosia jasota, txertaketa prozesuagaz amaitu dute. “Lehen dosia jaso zutenetik gaur arte ez da zailtasun azpimaragarririk egon txertoen eraginarengatik”. Txertoak eragina egiteko igaro beharreko 7-10 egunak igaro ostean, beraz, Artibai egoitzakoek ere immunitatea lortuko dute.
