Gune gorrian dauden herrietako ostalaritza establezimenduek zabaldu ahalko dute, auzitegiaren aginduz
EAEko Auzitegi Nagusiak ostalariek jarritako helegitea onartu du. Ez da behin betiko erabakia; auzitegiak esan du denbora gehiago beharko dutela auziaren muina aztertu eta ebazpen bat emateko. Jaurlaritzak uste du ostalaritza itxi izanak kutsatze kopuruak murriztea ahalbidetu duela, eta alegazioak aurkeztu ditu.
Gune gorrian dauden udalerrietako ostalaritza establezimenduek zabaltzeko baimena edukiko dute aurrerantzean. Hala erabaki du EAEko Auzitegi Nagusiak, ostalarien elkarteek jarritako helegite baten ondorioz. Auzitegiak hartutako behin behineko erabakia gaur [otsailak 9] arratsaldetik aurrera dago indarrean.
Berriz irekitzeko aukera ezarri arren, Jaurlaritzak onartutako dekretuak indarrean jarraitzen du. Beraz, zabaltzeko eskubidea badaukate ere, hainbat neurri bete beharko dituzte: hala nola 20:00etan ixtea, edukiera erdira murriztea, mahaietan eseritako pertsonen arteko distantziak bermatzea, mahai bakoitzeko lau pertsona esertzea eta barran ezin kontsumitzea.
Araba, Bizkai eta Gipuzkoako ostalariek aurreko astean jarri zuten Jaurlaritzaren aginduaren aurkako helegitea, iritzita «neurrigabea» dela gune gorrian dauden udalerrietako ostatuak ixteko agindua. Eta salatu zuten azken asteetan izan diren kutsatzeen jatorria ez dagoela tabernetan, “Gabonetako topaketen ondorio direla baizik”. Hori salatzeko, auzitara jo zuten, eta eskatu dute behin betiko erabakia hartu bitartean agindua bertan behera uzteko.
EAEko Auzitegi Nagusiak gaur [otsailak 9] aztertu du auzia, eta erabaki du ostalariek eskatutako behin-behineko neurriak onartzea; ez da behin betiko erabakia, ordea. Izan ere, auzitegiak esan du denbora gehiago beharko duela auziaren muina aztertu eta ebazpen bat emateko.
Ebazpena aldekoa izanda, ordea, ostalariak beldur dira Eusko Jaurlaritzak «zigor eredugarria» edota «baldintza berriak» ezarriko ote dizkieten. Hala adierazi diete berri agentziei gaur goizean, erabakiaren zain zeudela auzitegiaren aurrean, Bilbon egiten ari diren elkarretaratzean.
Alegazioak. Eusko Jaurlaritzak uste du, baina, ostalaritza itxi izanak kutsatze kopuruak murriztea ahalbidetu duela, eta atzo [otsailak 8] alegazioak aurkeztu zituen, udalerri horietan ostalaritza ixteko erabakia defendatzeko.
Bingen Zupiria Jaurlaritzako eledunak ez du balorazio zehatzik egin, baina adierazi du mahai gainean jartzen duela eztabaida indarrean dagoen legediak zenbaterainoko bermea ematen duen erabakitzeko. «Jaurlaritzak hilabete hauetan etengabe eskatu dio Espainiako Gobernuari uztea bere esku egoera honi aurre egiteko. Auzitegiaren epaiak galdera ikur bat handi bat jartzen du horren inguruan, benetan baditugun edo ez behar ditugun tresnak egoera honi erantzuteko»
