Ondarroako lonja berria 2023ko urtarrilerako amaituta egotea espero du Jaurlaritzak
Eraikitzen ari diren moduko azpiegitura bat "aspalditik" beharrezkoa zela nabarmendu du Arantxa Tapiak lonjara egindako bisitan. Arrantza sektoreko hainbat ordezkarigaz ere batu da sailburua, Brexit-aren osteko egoera berria zein den partekatzeko.
Anton Golzarri (Ondarroako portuko arduraduna), Eusebio Arantzamendi (Kofradiako presidentea), Zunbeltz Bedialauneta (Ondarroako alkatea) eta Arantxa Tapia (Ekonomiaren Garapen, Jasangarritasun eta Ingurumeneko sailburua), Ondarroako lonja berriko bentalekuan. Arantxa Tapia Eusko Jaurlaritzako Ekonomiaren Garapen, Jasangarritasun eta Ingurumeneko sailburuak Ondarroako lonja berria bisitatu du gaur [otsailak 12]. Lehen faseko lanak amaitu ostean, duela gutxi zerbitzua ematen hasi den instalazio berriaren funtzionamendua ezagutzeko aukera eduki du. Arraina deskargatzeko, sailkatzeko, pisatzeko eta erakusteko gunea hurretik ezagutu ditu, baita benta aretoa ere.
Bisitaren osteko agerraldian azaldu duenez, azpiegitura 2023ko urtarrilean amaituta egotea aurreikusten dute. Hala, lau urteko lanen ostean amaituko dute obra. Azpiegitura berria eraikitzeko obraren lehen faseari 2019ko martxoan eman zioten hasiera, eta egun, bigarren faseko lanekin hasita daude. Lanak Bycam, Gaimaz eta Altuna eta Uria enpresek sortutako Ondarroa Aldi Baterako Enpresa Elkarteari esleitu zizkion Jaurlaritzak eta 16.600.108,28 euroko aurrekontua du kontratuak (BEZ barik).
Alturako eta baxurako enkante motak onartzen dituen punta-puntako sistema informatikoa du bentalekuak. Inguruko portuetan sistema hori duen lehena da
Tapiaren hitzetan Ondarroa arrantza portu “sendo” bat da, “euskal kostaldean salmenta ikuspegitik jarduera handiena daukana”. Eraikitzen ari diren moduko azpiegitura bat “aspalditik” beharrezkoa zela berretsi du, eta egun “errealitatea” bihurtu dela. Horrelako azpiegitura batekin “orain arte planteatu gabeko” beste arrantza jarduera bat ere erakartzeko gai izango direla gaineratu du.
Zerbitzua ematen hasita dagoen eraikinari dagokionez, beheko solairu osoa arrantza jarduerara bideratua dago. “Iparraldeko hegala alturako arrantzatik datorren arraina jaso eta presta dadin antolatu da, eta hegoaldeko hegala, berriz, baxurako arraina sar dadin”.
[Ikusi ARGAZKI GALERIA zuzenean hemen]
Erdialdean ipini duten benta areto berriak, berriz, alturako eta baxurako enkante motak onartzen dituen sistema informatikoa duen bakarra dela azpimarratu du; 111 salmenta puntu digital eta arraina saltzeko punta-puntako software aurreratua ditu, besteak beste. “Sistema berri honek aukera ematen du egindako eskaintza bakoitza erregistratzeko eta arrainen salmenta etiketak egiteko, prozesuak optimizatuz, denborak minimizatuz eta une oro produktuaren trazabilitatea bermatuz”. Orain arte ez bezala, bi salmenta aldi berean egiteko aukera ere ematen duela gaineratu du.
Brexitaren osteko egoera mintzagai. Arrantza sektoreko hainbat ordezkarigaz batzeko aukera ere eduki du sailburuak. Alturako, baxurako eta komertzializatzaileekin egindako batzarrean Brexitaren ondorioak aztertu dituzte, eta Jaurlaritzak hartutako neurriei buruz berba egiteaz gain, egoera berriak arrantza jarduerari kalterik egin ez diezaion egin beharreko urratsei buruz ere jarduteko aukera eduki dute.
Bileran, Jaurlaritzak euskal flotaren kuotak jaisteak datozen bost urteetan izango duen eragina aztertuko duela jakinarazi die sektoreko ordezkariei, baita Erresuma Batuko arrantza flotaren eskaintza handitzeak Europako merkatuan edukiko duen eragina ere. “Jaurlaritzak Espainiako Ministerioari eskatuko dio zehatz-mehatz argitzeko bertoko flotarentzat eragina duten Europar Batasunaren eta Erresuma Batuaren arteko hitzarmenaren ondoriozko erabakiak”.
