Jeltzaleek diote Mutriku eta Debako udalek ez dutela ezer egin pasealekua Debaraino luzatzeko
Bi herrietako jeltzaleek esan dute proiektua aldundiari eta bereziki Aintzane Oiarbide diputatuari esker gauzatuko dela. "2015era arte Mutrikuko EH Bildu eta Berdeak+Independenteak bidea oztopatzen aritu ziren".
Gipuzkoako Foru Aldundiak joan den astean esan zuen urrirako amaituko dutela Mutriku eta Deba lotuko dituen pasealekua. Orain, baina, Mutrikuko eta Debako EAJko kideek esan dute proiektua aldundiari esker gauzatuko dela, ez bi herrietako udalek bultzatu dutelako. “Mutrikuko eta Debako udalek ez dute ezer egin pasealekua Debaraino heltzeko. Ez alkateek ez Debegesak ez dute urrats bat bera ere eman”.
Esan dutenez, Debako Udalean hasiera-hasieratik egon da egitasmo horri bultzada emateko alderdien arteko erabateko adostasuna. “Mutrikukoan, aldiz, zalantza asko eta lehentasunik eza izan ziren 2015era arte”.
Esan dutenez, aurreko agintaldiaren hasieran Mutrikuko Udalak (EAJ zegoen udal gobernuan) aldundiari kostaldeko errepidea hobetzeko eta bidegorria eraikitzeko egindako eskaerak baiezkoa jaso zuenean agerian geratu zen hura zela egitasmoa behingoz gauzatzen hasteko garaia. Jeltzaleen diotenez, orduan oposizioan zeuden bi alderdiei (EH Bildu eta Berdeak+Independenteak) lanak sasoi hartan hasteak ekarriko zituen onurak agertu zizkieten “behin baino gehiagotan”. “Gutxiengoan geundela baliatuz, eta interes orokorraren aurretik alderdi interesak jarriz, bidea oztopatzen aritu ziren eta, tamalez, babesik gabe egitasmoak ezin izan zuen aurrera egin. Aukera paregabea galduta geratu zen”.
Orain, errepidea eta bidegorria amaitu eta urtebete pasa denean, Urazamendik kaleko bizilagunen eta bidegorriaren erabiltzaileen aldetik galdera bat nagusitu dela diote: “Zergatik pasealekua ez da zubiraino eraman?”. Inguru horretan bizi direnak eta paseatzaileak geroz eta trafiko handiagoa jasan eta eremu horretara hurbiltzeko “inolako segurtasunik gabe” ibili behar izaten dutela gaineratu dute. “Hain zuzen ere, inguru horretako segurtasuna bermatzea eta degradatutako eremua zaharberritzea ziren aurreko agintaldian proiektua bultzatzeko arrazoi nagusienak”.
Esker oneko hitzak. Azaldu dute iazko udan errepideak eta bidegorriak izan zuten arrakasta dela eta, aldundiak sortzen ziren arriskuak atzeman eta inguruan segurtasuna bermatzeko landu du proiektua. “Bi herrietako EAJko udal taldeok eskerrik beroenak luzatu nahi dizkiogu aldundiari eta bereziki Aintzane Oiarbide diputatuari, Mutrikuko eta Debako herritarren eta bi udal taldeon kezkak aintzat hartuz, beste behin ere gure herritarren onginahia hobetzeko ahaleginean proiektua gauzatzeko benetako konpromisoa erakutsi duelako”.
